प्रधानमन्त्री एवं नेकपा (एमाले) का अध्यक्ष केपी शर्मा ओलीले आफ्नो पार्टीका पार्टीका केन्द्रीय सदस्यहरुबीच छलफल थालेका छन् । आगामी चैत १ गतेदेखि बोलाइएको केन्द्रीय कमिटी बैठकको तयारीका लागि अहिले बालुवाटारमा छलफल सुरु भएको हो ।
प्रधानमन्त्री निवास बालुवाटारमा केहीबेरअघि शुरू भएको छलफलमा प्रधानमन्त्री निकट केन्द्रीय सदस्यहरूको सहभागिता छ । पार्टीले लिने नीति र केन्द्रीय कमिटीको एजेन्डा तय गर्नका लागि छलफल केन्द्रित भएको बताइएको छ ।
छलफलमा नेकपा एमालेको नवौं महाधिवेशनबाट निर्वाचित तथा त्यसपछि मनोनित केन्द्रीय सदस्यहरूसँग प्रधानमन्त्री तथा पार्टी अध्यक्ष ओलीले अनौपचारिक छलफल गरिरहेका हुन् । एमालेको २०५ सदस्यीय केन्द्रीय कमिटीको बहुमत सदस्य प्रधानमन्त्री ओलीको पक्षमा छन् ।
यसअघि नेकपामा ओलीले थपेका ४ सय सदस्य समेत एमालेको केन्द्रीय सदस्य स्वत: बनाउने ओलीको तयारी छ । मुलुकको पछिल्लो राजनीतिक अवस्थाका बारेमा छलफल गर्न भन्दै सत्तारुढ एमालेले पार्टीको केन्द्रीय कमिटी बैठक बोलाएको हो ।
बैठकमा सरकार र मुलुकको राजनीतिक विषयमा छलफल हुने जनाइएको छ। सर्वोच्च अदालतले एकीकरण बदर गर्दै एमाले र माओवादी केन्द्रलाई ब्यूँताएपछि पहिलो पटक एमालेको केन्द्रीय कमिटीको बैठक बस्न लागेको छ ।
