संस्थापन पक्षले स्पष्टीकरण मागेर कारबाही प्रक्रिया अघि बढाउने भएपछि नेकपा एमालेको माधव नेपाल पक्षले लडाइँमा मैदान पनि नछोड्ने र पार्टी पनि नफुटाउने रणनीति बनाएको छ । माधव नेपाल पक्षका स्थायी कमिटी सदस्यको अनौपचारिक छलफलले लडाइँमा मैदानमा डटेर लाग्ने रणनीति अख्तियार गर्ने नीति बनाएका हुन् ।
एमाले केन्द्रीय कमिटीको शनिबारको बैठकले गुटगत भेला गरेर पार्टीविरोधी गतिविधि गरेको भन्दै नेता नेपालसहित उनी पक्षका नेतालाई स्पष्टीकरण सोधेको छ । नेपालसहित भीम रावल, सुरेन्द्र पाण्डे र घनश्याम भुसाललाई स्पष्टीकरण सोध्ने निर्णय गरेको थियो । तर, नेपाल पक्षले भने ओली पक्षसँग संघर्ष गर्ने र विकसित पछिल्लो अवस्थाबाट अलिकति पनि विचलित नहुने भन्दै कार्यकर्तालाई पनि उच्च मनोबलका साथ आफ्नो कार्यक्षेत्रमा खटिन आग्रह गरेको छ ।
यसबीचमा नेपाल पक्षले जनवर्गीय संगठनहरुका भेला बेलाई अलग नेतृत्व चयन प्रक्रिया जारी राखेको छ भने अब जिल्ला हुँदै तल्लो तहसम्म समानान्तर कमिटी बनाउने क्रम बढेको छ । नेपाल पक्षले मंगलबार पनि आफूनिकट अनेरास्ववियुको राष्ट्रिय भेला गरेको छ ।
भेलालाई सम्बोधन गर्दै नेता नेपालले कुनै पनि काममा सफलता पाउन इमान्दारिता र समपर्णभाव आवश्यक रहेको भन्दै आफू त्यसको पक्षमा रहे पनि अध्यक्ष ओली त्यसविपरीत हिँडेको र कम्युनिस्ट आन्दोलनलाई विसर्जन र विघटनको दिशामा लगिरहेका बताए । ‘केपी ओलीको भ्रमबाट मुक्त हुनुपर्छ ।
उनी कम्युनिस्ट आन्दोलनलाई विसर्जन र विघटनतर्फ लाँदैछन् । तर हामी पार्टी फुटाउँदैनौँ, मैदान पनि छोड्दैनौ । पार्टी फुटाउने केपी ओली हुन्,’ नेपालको दावी छ ।
उनले आफ्नो पक्ष र केपी ओलीबीच खराब र असल छुट्याउन आग्रह गरे । उनले केपी ओलीले खराव कुरा मात्र सिकाउने गरेको भन्दै आफूहरुले असल कुरा सिकाउने गरेको बताए ।
‘कमजोरी हटाउन नसक्नेले राम्रो कुरा ग्रहण गर्न सक्दैन । हामी र केपी ओलीबीच फरक यही छ । केपी ओलीले विद्यार्थीले पढ्नुहुँदैन । हामी पढ्नुपर्छ भनेर सिकाउँछौँ । मिहिनेतका साथ अध्ययन गर्नेलाई हौसला पनि प्रदान गर्छौँ’, नेता नेपालले भने, ‘ फरक भनेकै यही हो ।’
