एमाले अध्यक्ष केपी ओली र वरिष्ठ नेता माधव नेपालले थापाथलीस्थित पार्टी कार्यालयमा निर्णायक छलफल गर्ने भएका छन् ।
प्रधानमन्त्रीका आर्थिक सल्लाहकार मोतीलाल दुगडले केही बेरपछि २ नेताबीच भेटवार्ताको टुंगो लाग्ने बताए । पार्टी कार्यालयमा उहाँहरूबीच भेटघाटको तयारी भएको र १ घण्टाजतिमा सबै कुरा प्रस्ट हुने उनले बताए ।
यो बैठकले पार्टीभित्र बढेको विवादको निराकरण गर्ने विश्वास पनि उनले व्यक्त गरे ।
विश्वासको मत लिने मिति नजिकिँदै जाँदा ओलीले नेता नेपाल र झलनाथ खनाल पक्षका नेताहरूसँग छलफल भएका संवाद बढाएका छन् । ओलीले बिहीबार राति माधव नेपालसँग टेलिफोनमा कुरा गर्दै तिक्तता घटाउने उपायहरूबारे परामर्श गरेका थिए ।
नेपालनिकट एक नेताका अनुसार खनाल नेपाल पक्षका नेताहरूमाथि चलाएको अनुशासनको कारबाही फुकुवा गर्न ओली तयार देखिएका छन् । उनले एकलौटी थपेका पार्टी पदाधिकारी र सदस्य फिर्ता लिन माधव पक्षले राखेको माग सम्बोधन गर्न भने उनी अहिलेसम्म तयार देखिएका छैनन् ।
