पार्टीको निर्णय विपरीत प्रधानमन्त्री केपी शर्मा ओलीलाई समर्थन गरेको भन्दै जनता समाजवादी पार्टी (जसपा) को उपेन्द्र यादव पक्षले पार्टी अध्यक्ष महन्थ ठाकुरसहित चार जना नेतालाई पार्टीबाट निष्कासन गर्ने निर्णय गरेको छ ।
यादवको अध्यक्षतामा बसेको पार्टीको कार्यकारिणी समितिको बैठकले ठाकुरसहित नेताहरू राजेन्द्र महतो, लक्ष्मणलाल कर्ण र सर्वेन्द्रनाथ शुक्ललाई निष्कासन गर्ने निर्णय गरेको हो ।
यसअघि दुवै पक्षले एक अर्कालाई स्पष्टीकरण सोधेका थिए । प्रधानमन्त्री केपी शर्मा ओलीलाई समर्थन गर्ने÷नगर्नेबारे जसपाभित्र पहिलेदेखि नै विवाद बढ्दै आएको थियो ।
पछिल्लो पटक प्रतिनिधि सभा विघटन गर्ने प्रधानमन्त्री ओलीको निर्णयलाई ठाकुर पक्षले समर्थन गरेको छ । यादव पक्ष काँग्रेस–माओवादीको विपक्षी गठबन्धनमा छ ।
ठाकुर पक्षले सरकारमा जानको लागी सरकारसँग सहमति समेत गरेको छ । केही दिनभित्रै ठाकुर समूह सम्मानजनक मन्त्रालय लिएर सरकारमा जाने बताइएको छ ।
