नेपाली कांग्रेसका सभापति शेरबहादुर देउवाले राष्ट्रपतिबाट पदकै गरिमा समाप्त पार्ने काम भएको आरोप लगाएका छन्।
संविधानले दिएको राष्ट्रपतिको पदीय जिम्मेवारी र कर्तव्य पूरा नगर्दा राष्ट्रपति भण्डारीले पदीय गरिमालाई नै समाप्त पारेको बताएका हुन् ।
विपक्षी गठबन्धनले सोमबार संघीय संसद् भवनमा गरेको बुद्धिजीवीसँगको अन्तरक्रियामा सभापति देउवाले राष्ट्रपति स्वयंले पनि आफूले बोलेको कुरा नपुर्याएको बताए ।
राष्ट्रपतिले संविधानको धारा ७६ को उपधारा ५ अनुसार सरकार बनाउनु भनेर आह्वान गरेको र पछि सो आह्वानअनुसार कर्तव्यपालन नगरेको जनाए । उनले राष्ट्रपति प्रधानमन्त्री केपी शर्मा ओलीको कार्यकर्ता जस्तो बनेको आरोप पनि लगाए ।
देउवाले न्यायालयबाट सही फैसला हुने विश्वास व्यक्त गरे । संविधानको अन्तिम व्याख्या गर्ने संस्था अदालत भएको उल्लेख गर्दै उनले संविधानमा भएको व्यवस्थाअनुसार नै अदालतको फैसला आउने जनाए ।
उनले आफ्नो सरकार बनेपछि पहिलो प्राथमिकता कोरोनाविरूद्धको खोप ल्याउने बताए । सुनुवाइ समितिबाट सुनुवाइ नभई आफैँ अनुमोदन हुने व्यवस्था हटाएर भए पनि यसबीचमा भएका सबै नियुक्ति र निर्णयहरू खारेज हुने दाबीसमेत देउवाले गरेका छन् ।
