सर्वोच्च अदालतले प्रतिनिधिसभा विघटनविरुद्धको फैसला सोमबार सुनाउन सक्ने अवस्थालाई मध्यनजर गर्दै अदालत परिसरमा सुरक्षा सतर्कता बढाइएको छ । सर्वोच्च अदालत रामशाहपथ वरपर अहिले बाक्लो रुपमा सुरक्षाकर्मी परिचालन गरिएको छ ।
फैसला आएमा पक्ष वा विपक्षमा हुनसक्ने गतिविधि नियन्त्रणको लागि सुरक्षास्थित मजबुत बनाइएको जिल्ला प्रहरी परिसर काठमाडौंका एसएसपी अशोक सिंहले बताए । काठमाडौंका सडकमा अहिले ७ सयको हाराहारीमा प्रहरी परिचालन गरिएको छ ।
मुख्य सडकहरूमा अहिले नेपाल प्रहरीसँगै सशस्त्र प्रहरी बलको पनि बाक्लो उपस्थिति देखिन्छ ।
जेठ ८ गते प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले प्रतिनिधिसभा विघटन गरेकी थिइन् । यो दोस्रो पटकको विघटन हो । विघटनका विरुद्ध परेको रिट सोमबार पेसी चढेको छ। र सोमबारै फैसला आउन सक्ने आँकलन गरिएको छ ।
