काठमाडौं । अर्थमन्त्री जनार्दन शर्माले प्रमुख प्रतिपक्षी दल एमालेको सहमतिमै संसदमा पेश भएका अर्थसम्बन्धी विधेयकहरू पारित गर्ने बताएका छन् ।
एमाले सांसदहरूको नाराबाजीकाबीच प्रतिनिधिसभा बैठकमा विनियोजन विधेयक, राष्ट्र ऋण उठाउने विधेयकसहित विभिन्न अर्थसम्बन्धी विधेयक पेश भएका छन् । एमालेलाई सहमतिमा ल्याएर ती विधेयक पारित गर्ने अर्थमन्त्री शर्माले बताएका हुन् ।
‘सहमतिका लागि वार्ता भइरहेको छ । सहमतिबाटै पारित गर्छौं’, अर्थमन्त्री शर्माले भने, ‘सहमति भएन भने नियमित प्रक्रियाबाट पारित गर्छौ ।’ संसद् अधिवेशन अन्त्य गरेर अध्यादेशमार्फत बजेट ल्याउने चर्चा भए पनि उनले त्यो विषयमा सरकारले नसोचेको बताएका छन् । उनले अध्यादेश नल्याउने बताए ।
