राजविराज । श्रीमानकै अगाडि बलात्कार गरेर फरार भएका एक व्यक्ति १२ बर्षपछि पक्राउ परेका छन् ।
सप्तरीको हनुमाननगर कंकालिनी नगरपालिका ११ इनरुवाका ५० वर्षीय हरिनारायण यादव बुधबार पक्राउ परेका हुन् ।
घटनामा संलग्न सोही स्थानका अर्का व्यक्ति खटर यादवको खोजी भइरहेको प्रहरीले जनाएको छ ।
सुनसरीको इनरुवामा मजदुरी गरेर दसैं मनाउन २०६४ असोज २९ गते राति हनुमाननगर हुँदै घर फर्किरहेका बेला यादवद्वयले दम्पतीमाथि आक्रमण गरेका थिए।
दुवैजनाले पतिलाई नियन्त्रणमा लिएर पत्नीलाई बलात्कार गरेका थिए । उनीहरुले दम्पतीको साथमा रहेको १० हजार रुपैयाँ समेत लुटेर फरार भएका थिए ।
पीडितले २०६४ असोज ३० गते जिल्ला प्रहरी कार्यालयमा उजुरी दिएका थिए ।
पीडित दम्पतीले ढिलै भए पनि न्याय पाउने प्रतिक्रिया दिएका छन् ।
