काठमाडौं । पश्चिमी वायुको प्रभावका कारण शुक्रबार देशभरको मौसम बदली भएको छ । अहिले देशका विभिन्न स्थानमा सामान्य झरी परेको मौसम पूर्वानुमान महाशाखाले बताएको छ ।
बदलीसँगै नेपालका पश्चिम भूभागका केही स्थानमा भने चट्याङसहित वर्षा र हिमपात भएको महाशाखाले जनाएको छ।
पश्चिममा बिहानैदेखि पानी र हिउँ परेको र काठमाडौंसहित मध्य र पूर्वमा दिउँसोपछि पानी परिरहेको महाशाखाका मौसमविद् गंगा नगरकोटीले बताए ।
आज देशभरकै मौसम बदलीसहित वर्षा र हिमपात गराउने पश्चिमी वायु कमजोर हुँदै जाने भएकाले भोलि शनिबारदेखि मौसम बिस्तारै खुल्ने पनि महाशाखाले जनाएको छ ।
यसैबीच मौसम बदली भएपछि आज दिनभरजस्तो त्रिभुवन अन्तर्राष्ट्रिय विमानस्थलमा उडान र अवतरण प्रभावित भएको छ ।
दिउँसो रोकिएको उडान अहिले सुरु भएको विमानस्थलले जनाएको छ ।
