८० भन्दा बढी देशमा फैलियो कोरोना भाइरस, सतर्क यसरी रहने

फागुन २२, २०७६

विश्व स्वास्थ्य संगठनले दक्षिण र दक्षिणपूर्वी एसियाका देशहरुमा कोरोना भाइरसको संक्रमण फैलन थालेको भन्दै चिन्ता व्यक्त गरेको छ ।विश्व स्वास्थ्य संगठन दक्षिणपूर्वी एसिया क्षेत्रका क्षेत्रीय निर्देशक क्षेत्रपाल सिंहले एक विज्ञप्ति जारी गर्दै सतर्कता अपनाउन आग्रह गरेका हुन् ।

विश्वमा कोरोना भाइरसका कारण अहिलेसम्म ३ हजार २ सय ८६ को मृत्यु भइसकेको छ । चीनसहित इरान, इटली, अमेरिकालगायत विश्वका झन्डै ८० देशमा कोरोना फैलिसकेको छ । चीनमा सर्वाधिक ९५ हजार ४ सय ८८ जनामा संक्रमण देखिएको थियो । जसमध्ये अहिलेसम्म ५७ हजार ९ सय ७५ जना कोरोनामुक्त भइसकेका छन् ।

पछिल्लो समयमा भारत, इन्डोनेसिया र थाइल्याण्डमा समेत कोराना भाइरसको संक्रमण बढ्दै गएको छ । नेपाल, बंगलादेश, भुटान, कोरिया, भारत, इन्डोनेसिया, माल्दिभ्स, म्यानमार, श्रीलंका, थाइल्यान्ड, पाकिस्तान, पूर्वी टिमोरलगायत दक्षिण एसिया र दक्षिणपूर्वी एशियामा संक्रमण फैलनसक्ने भएकाले सचेत रहन विश्व स्वास्थ्य संगठनले आग्रह गरेको हो ।

जोगिन के गर्ने ?

हातमार्फत एक–अर्कामा संक्रमण सर्न सक्ने भएकाले हात नमिलाउनुस् ।
हातलाई राम्रोसँग साबुनपानीले सफा गर्नुस् ।
व्यक्तिगत सरसफाइमा धेरै ध्यान दिनुस् ।
मासु राम्रोसँग पकाएर मात्र खानुस् ।
रुघाखोकी लाग्नु, ज्वरो आउनु, श्वास फेर्न गाह्रो हुनु कोरोनाका लक्षण हुन् । त्यस्ता लक्षण देखिनेबित्तिकै तुरुन्त अस्पताल जानुस् ।
धेरै भिडभाड भएको ठाउँमा नजानुस् ।
खोक्दा र हाछ्युँ गर्दा थुकका छिटा बाहिर जान सक्छन् । त्यसैले सर्जिकल मास्क प्रयोग गर्नुस् । प्रयोग गरेको मास्क जताततै नफाल्नुस् ।
अहिले कोरोना संकमणले गर्दा मानिस त्रसित छन् । यस्तोमा सकारात्मक सोच्नुपर्छ र आफ्नो आत्मबल उँचो राख्नुपर्छ ।
रोग प्रतिरोधात्मक क्षमता कम भएका मानिस कोरोनाबाट संक्रमित हुने सम्भावना धेरै भएकाले प्रतिरोधात्मक क्षमता बढाउने खानेकुरा खानुस् । सन्तुलित भोजन गर्नुस् ।
खानेपानी तताएर खानुस् । तातो खानेकुरा धेरै खानुस् ।
मौसम परिवर्तनको समय भएकाले रुघाखोकी लाग्ने गर्छ । त्यसैले रुघाखोकी लाग्नेबित्तिकै कोरोना भयो भनेर मानसिक तनाव नलिनुस् । बरु, चिकित्सकसँग परामर्श गर्नुस् ।