काठमाडौं महानगरपालिकाले बढी भीडभाड हुने खालका जात्रा तथा उत्सव नमाउन आग्रह गरेको छ ।
कोरोना भाइरस (कोभिड–१९)को संक्रमण फैलिन नदिन भन्दै शनिबार एक विज्ञप्ति निकाल्दै महानगरपालिकाले यस्तो आग्रह गरेको हो ।
यसका अलवा काठमाडौं महानगरपालिकाले घोडेजात्रा, सेतो मछिन्द्रनाथको रथयात्रालगायत जात्रा तथा पर्व नमनाउन पनि आग्रह गरेको छ । कोभिड–१९ संक्रमण फैलिन सक्ने भन्दै महानगरले शनिबार एक विज्ञप्ति निकाल्दै यस्तो आग्रह गरेको हो ।
महानगरले विभिन्न धर्म, संस्कृति मान्ने समुदायको पनि बाहुल्यता रहेको भन्दै मठ, मन्दिर, मस्जिद, गुम्बा, चैत्य, चर्चजस्ता धार्मिकस्थलमा पनि भिडभाड कम गर्न पनि आग्रह गरेको छ ।
धार्मिकस्थलमा धेरै भीडभाड हुँदा संक्रमण सर्न सक्ने सम्भाव्यतालाई मध्यनजर गर्दै ती स्थानमा समेत भीडभाड नगर्न महानगरले यस्तो आग्रह गरिएको बतायो ।
महानगरपालिकाले कसैलाई कोरोनाको संक्रमणको आशंका लागे टोल फी नं. ११८०मा खबर गर्न अनुरोध गरेको छ ।
महानगरपालिकाले निकालेको शनिबार निकालेको विज्ञप्तिमा एम्बुलेन्स सेवा १०२ तथा महानगरको टोल फ्रि नं ११८० मा खबर तथा सूचना दिन अनुरोध गरेको छ ।
साथै, महानगरले विज्ञप्तिमार्फत कोभिड–१९ को सन्त्रास र सो सन्त्रासबाट जोगिन सबैले सजगता अपनाउन अनुरोध गरेको छ । ‘संक्रमण देखिनुभन्दाअघि नै हामी सबै नागरिकले सजगता अपनाउने हो,’ विज्ञप्ति जारी गर्दै महानगरले भनेको छ ।
कामपाले कोरोना भाइरस रोकथामका लागि सूचनामूलक सन्देश डिजिटल बोर्ड, पर्चा, पम्प्लेट नेपाली र नेपालभाषा दुवैमा प्रकाशित गरी जनचेतनामूलक अभियान सञ्चालन गर्ने बताएको छ ।
