पुराना पास भएका सवारी साधनमा लागू भएको जोर-बिजोर प्रणाली लागू नहुने भएको छ । जसअनुसार लकडाउनमा बैंक तथा वित्तीय संस्थाका कर्मचारी यसअघि राष्ट्र बैंकबाट जारी भएको पासले नै हिँड्न पाउने छन् ।
लकडाउनको नयाँ मोडालिटीअनुसार सवारीको हकमा जोर-बिजोर प्रणाली लागू गरेको भए पनि यसअघि जारी गरिएको पास भने खरेज नगरिएको महानगरीय ट्राफिक प्रहरी महाशाखाले जनाएको छ ।
बैंक तथा वित्तीय संस्थाका कर्मचारी, स्वास्थ्यकर्मी र सञ्चारकर्मीलाई जोर बिजोर प्रणाली लागू नहुने महानगरीय ट्राफिक महाशाखा प्रमुख भीम ढकालले बताए ।
उनले बैंकिङ कर्मचारीलाई पासका आधारमा चल्न दिने बताए । पास नभएकालाई भने जोर-बिजोर प्रणाली लागू हुनेछ ।
सञ्चारकर्मीलाई पनि रोक नलगाइने ढकालले बताए । राष्ट्र बैंकले यसअघि बैंक तथा वित्तीय संस्थाहरुलाई २ पटक गरेर पास वितरण गरिसकेको छ ।
पहिलो पटक प्रत्येक वाणिज्य बैंकलाई २० वटा, प्रत्येक विकास बैंकलाई १० वटा, प्रत्येक वित्त कम्पनीलाई ८ र प्रत्येक लघुवित्त संस्थालाई ६ वटाको दरले पास वितरण गरेको थियो ।
त्यसपछि सरकारले कर तिर्ने समय तोकेपछि राजश्व संकलन गर्ने कार्यालयमा बढी कर्मचारी खटाउनु पर्ने भएपछि बैंकहरुको अनुरोधमा राष्ट्र बैंकले वाणिज्य बैंकहरुलाई मात्र २७० वटा पास वितरण गरिसकेको छ ।
सरकारले लकडाउन खुकुलो बनाउने नयाँ मोडालिटीअनुसार उपत्यकाका ३ जिल्लाभित्र र उपत्यका बाहिरका जिल्लाभित्रमा हुने गरी निजी सवारीमा जोर-बिजोर प्रणाली लागू गरी सवारी साधन आजबाट खुला गरेको छ ।
महानगरीय ट्राफिक महाशाखाका अनुसार हाल लागू गरिएको जोर-बिजोर प्रणाली दमकल, एम्बुलेन्स, फोहोर व्यवस्थापनका सवारी साधान र सबै प्रकारका ढुवानीका सवारी साधनमा लागू हुँदैन ।
