काठमाडौं । अख्तियार दुरुपयोग अनुसन्धान आयोगले नेपाल विद्युत् प्राधिकरण जनकपुर क्षेत्रीय कार्यालयअन्तर्गत बर्दीबास उपवितरण केन्द्रमा कार्यरत तत्कालीन इञ्चार्ज सञ्जीव शर्मासहित आठ जनाविरुद्ध आज विशेष अदालतमा मुद्दा दायर गरेको छ । ग्राहकबाट उठाएको महसुल राजश्व खातामा जम्मा नगरी अपचलन गरेको पाइएको आयोगको अध्ययनबाट खुलेको छ ।
आयोगका अनुसार राजश्व अपचलन गरेको अभियोगमा शर्माविरुद्ध २० लाख ३३ हजार २७२ रुपैयाँ, प्राधिकरणका कर्मचारीहरु अरविन्दप्रसाद जयसवालविरुद्ध चार लाख ७५ हजार ४६६ रुपैयाँ र बागेश्वरीकुमारी कर्णविरुद्ध ५३ हजार ८२१ रुपैयाँ बिगो कायम गरी मुद्दा दायर गरिएको छ ।
यस्तै कर्मचारीहरु चन्द्रभूषण महत्तो चार लाख छ हजार १३९ रुपैयाँ, धर्मेन्द्रकुमार महतो ६६ हजार ८३७ रुपैयाँ, अजितमान सिंह २२ हजार ८१३ रुपैयाँ, स्मिता कट्टेल सात लाख ७४ हजार १०४ रुपैयाँ, अञ्जुकुमारी बस्नेत १२ हजारबराबरको बिगो कायम गरी मुद्दा दायर गरिएको प्रवक्ता प्रदीपकुमार कोइरालाले जानकारी दिए ।
