काठमाडौं । कोरोना भाइरस (कोभिड–१९) संक्रमणका कारण काठमाडौंमा एक पुरुषको मृत्यु भएको छ ।
स्वास्थ्य तथा जनसंख्या मन्त्रालयका अनुसार, कोरोना संक्रमणका कारण बानेश्वरका एक वृद्धको मृत्यु भएको हो ।
८५ वर्षीय पुरुषको असार १७ गते काठमाडौंको एक निजी अस्पतालमा मृत्यु भएको मन्त्रालयले जनाएको छ ।
उनी उच्च रक्तचाप र पार्किन्सनको बिरामी रहेको बताइएको छ । छाती दुखेपछि र पिसाब कम हुने समस्या देखिएपछि उनी अस्पताल भर्ना भएका थिए ।
अस्पतालको आइसोलेसनमा राखी उपचार भइरहेका बेला उनको मृत्यु भएको मन्त्रालयका प्रवक्ता डा. जागेश्वर गौतमले जानकारी दिए ।
योसँगै नेपालमा कोरोना संक्रमणका कारण मृत्यु हुनेको संख्या ३२ पुगेको छ ।
