काभ्रे । काभ्रेमा कोरोना संक्रमित व्यक्तिको कन्ट्याक्ट ट्रेसिङ गर्दा परिवारका अन्य सात जनामा कोरोना संक्रमण देखिएको छ ।
धुलिखेल नगरपालिका–७ का ९८ वर्षीय वृद्धको गएराति धुलिखेल अस्पतालमा मृत्यु भएको थियो । उनी काठमाडौं नयाँबानेश्वरमा बस्दै आएका थिए ।
वृद्धको प्रत्यक्ष सम्पर्कमा आएकाहरुको स्वाब संकलन गरी परीक्षण गर्दा सात जनाको कोरोना रिपोर्ट पोजेटिभ आएको हो ।
ती वृद्धका दुई छोरा, दुई छोरी, एक बुहारी, एक नातिनी र एक जना आफन्तमा कोरोना संक्रमण पुष्टि भएको हो ।
मृतकका अर्का एक छोरा–बुहारीमा यसअघि नै कोरोना सक्रमण पुष्टि भइसकेको थियो ।
यसैबीच, धुलिखेल अस्पतालका थप ६ जना स्वास्थ्यकर्मीमा समेत संक्रमण देखिएको छ ।
कोरोना संक्रमणको जोखिम बढ्दै गएपछि धुलिखेल नगरपालिकाले बजार क्षेत्र सिल गरेको छ ।
