बैतडीको मेलौली नगरपालिका सिल गरिएको छ । नगरपालिकामा कार्यरत एक कर्मचारी र भारतबाट फर्केका एक स्थानीयमा कोरोना सङ्क्रमणको पुष्टि भएपछि नगरक्षेत्र सिल गरिएको हो ।
मंगलबार बसेको सो पालिकाको आकस्मिक बैठकले असोज १७ गते राति १२ बजेसम्मका लागि नगरक्षेत्र सिल गर्ने निर्णय भएको प्रमुख प्रशासकीय अधिकृत रामदत्त भट्टले जानकारी दिए ।
उनले भने, ‘सङ्क्रमण पुष्टि भएका व्यक्तिको कन्ट्याक टे«सिङ गरी स्वाब सङ्कलन गर्ने कार्य हुने भएकोले नगरक्षेत्र सिल गरिएको हो ।’ नगरपालिकाको गाडीको चालकमा कोरोना पुष्टि भएपछि स्वास्थ्य र आकास्मिक सेवा बाहेकका अन्य सम्पूर्ण सेवा बन्द रहने मेलौली नगरपालिकाका स्वास्थ्य शाखा प्रमुख नारायण चन्दले जानकारी दिए ।
सिल गरिएको अवधिमा नगरपालिकाका सबै विद्यालय, वित्तीय संस्था, सरकारी कार्यालय बन्द रहने छन् । यस्तै व्यापार, व्यवसाय र यातायात सेवा पनि बन्द, आवतजावतमा पूर्ण रुपमा बन्द र एक वडाबाट अर्को वडामा आउजाउमा रोक लगाइएको छ । मेलौलीमा हालसम्म ३६ जनामा कोरोना सङ्क्रमण पुष्टि भएकोमा दुई जना मात्र सक्रिय सङ्क्रमित छन् ।
आज थप तीन जनामा कोरोना सङ्क्रमणको पुष्टि भएको छ । जिल्ला अस्पतालको प्रयोगशालामा गरिएको परीक्षणमा मेलौली नगरपालिकाका दुई र दशरथचन्द नगरपालिकाका एक गरी तीन जनामा सङ्क्रमण पुष्टि भएको हो ।
सङ्क्रमण पुष्टि हुनेमा मेलौली नगरपालिकामा कार्यरत २४ वर्षीय पुरुष कर्मचारी, मेलौली नगरपालिका–८ का ३० वर्षीय पुरुष र दशरथचन्द नगरपालिका–९ का ३६ वर्षीय पुरुष रहेका छन् ।
सङ्क्रमण पुष्टि हुने कर्मचारी नगरपालिकाको गाडीको चालक र अन्य दुई जना भारतबाट फर्किएका व्यक्ति रहेको स्वास्थ्य कार्यालय बैतडीका कोभिड–१९ सम्पर्क व्यक्ति भुवनप्रसाद जोशीले बताए ।
योसँगै बैतडीमा सङ्क्रमितको सङ्ख्या ४०९ पुगेको छ । जसमध्ये हाल ३१ जना मात्रै सक्रिय सङ्क्रमित रहेका छन् । एक जनाको भने कोरोना सङ्क्रमणकै कारण ज्यान गएको छ ।
हालसम्म जिल्लाको पञ्चेश्वर गाउँपालिकाका सबैभन्दा बढी ६१ जनामा सङ्क्रमण पुष्टि भएको छ । त्यस्तै दशरथचन्द नगरपालिकाका ५६, सिगास गाउँपालिकाका ५१, शिवनाथ गाउँपालिकाका ५०, पाटन नगरपालिकाका ४९, दोगडाकेदार गाउँपालिकाका ४६ जनामा सङ्क्रमण पुष्टि भइसकेको छ ।
यस्तै, मेलौली नगरपालिकाका ३६, सुर्नया गाउँपालिकाका २८, पुर्चौंडी नगरपालिकाका २० र डिलाशैनी गाउँपालिकाका १० जनामा सङ्क्रमण पुष्टि भएको छ ।
