काठमाडौं । माइतीघरमा जारी उखु किसानको आन्दोलनमा उद्योग वाणिज्य तथा आपुर्तीमन्त्री लेखराज भट्ट उपस्थित भएका छन् ।
मन्त्री भट्टसँगै संघीय मामिला तथा सामान्य प्रशासन मन्त्री ह्रदयेश त्रिपाठी पनि आन्दोलनमा सहभागी भए ।
शुक्रबार माइतीघर मण्डलामा आएका मन्त्री भट्टले उखु किसानहरुले अब आफ्नो परिश्रमकको भुक्तानी लिन आन्दोलन गरिरहन नपर्ने बताए ।
उनले भुक्तानी नदिने मिल सञ्चालकहरुलाई पक्राउ पुर्जी जारी गरिएको र उनीहरुले भुक्तानीको प्रक्रिया सुरु गरिसकेको भन्दै आन्दोलन स्थगित गरेर घर फर्कन आग्रह गरे ।
किसानहरुको आन्दोलनप्रति ऐक्यवद्धता प्रकट गर्न प्रमुख प्रतिपक्षी दल नेपाली कांग्रेसका वरिष्ठ नेता रामचन्द्र पौडेलसमेत सहभागी भएका थिए ।
आन्दोलनकारीलाई सम्बोधन गर्दै नेता पौडेलले तत्काल किसानको रकम भुक्तानीको व्यवस्था मिलाउन र मिल सञ्चालकहरुलाई कारबाही गर्न सरकारसँग आग्रह गरे ।
गतवर्ष सरकारसँग भएको सहमति कार्यान्वयन र चिनी मिलबाट उखुको बक्यौता भुक्तानी पाउनुपर्ने माग गर्दै उखु किसाहरु मंसिर २८ गतेदेखि राजधानी आएर आन्दोलन गरिरहेका छन् ।
उनीहरुले रौतहट, सर्लाही र नवलपरासीका विभिन्न चिनी मिलबाट किसानले करिब ९० करोड रुपैयाँ भुक्तानी लिन बाँकी रहेको बताए ।
