काठमाडौं । जन्ती लिएर सडकमा गुडिरहेको माइक्रोबसमा आगलागी भएको छ । जनकपुरधामको सडकमा गुडिरहेको माइक्रोबसमा भएको आगलागीबाट दुईजना घाइते भएको प्रहरीले जनाएको छ ।

शनिबार साँझ प्रदेश २ का मुख्यमन्त्री तथा मन्त्रिपरिषद्को कार्यालय अगाडि गुडिरहेको माइक्रोबसमा आगलागी भएको बताइएको छ । प्रहरीका अनुसार प्रदेश ३–०१–०२४ च ८९१८ नम्बरको माइक्रोबस डिभाइडरमा ठोक्किएर आगलागी भएको हो ।

धनुषाको महेन्द्रनगरबाट युदुकुहा जन्ती लिएर गइरहेको गाडीमा १३ जना यात्रु रहेको प्रहरीले जनाएको छ । ती जन्तीमध्ये दुईजना घाइते भएका हुन् । आगोले गाडीको ९० प्रतिशत भाग जलेको बताइएको छ ।