काठमाडौं । नेपाल विद्युत् प्राधिकरणको कार्यकारी निर्देशकमा कुलमान घिसिङ नियुक्त भएका छन् । सोमबार बसेको मन्त्रिपरिषद् बैठकले उनलाई नियुक्ति दिएको हो ।
ऊर्जा जलस्रोत तथा सिँचाइमन्त्री पम्फा भुसालले मन्त्रिपरिषदमा पेश गरेको प्रस्तावअनुसार घिसिङलाई नियुक्ति दिइएको हो ।
प्राधिकरणका वर्तमान कार्यकारी निर्देशक हितेन्द्र देव शाक्यलाई जल तथा ऊर्जा आयोगमा सरुवा गरिएको एक मन्त्रीले जानकारी दिए ।
आयोगमा विशिष्ट श्रेणी पद सिर्जना गरेर शाक्यलाई सरुवा गरिएको हो । शाक्यले अहिले खाइपाइ आएको सुविधा नघट्ने गरी आयोगमा लगिने भएको छ ।
शाक्यले पनि यसअघि आफूलाई अन्याय नहुने गरी अन्य जिम्मेवारी दिए जाने बताएका थिए ।
शाक्यको सम्मानजनक बहिर्गमनका लागि प्राधिकरणमा खाईपाई आएको तलब सुविधा दिने गरी आयोगमा पठाउने प्रस्तावप्रति अर्थको सहमति आवश्यक पर्छ ।
अर्थमन्त्री जनार्दन शर्मा सोमबारको मन्त्रिपरिषद्को बैठकमा उपस्थित नभएकाले त्यसको माइन्युट बैठकमा नभएको स्रोतको भनाइ छ ।
शाक्य प्रधाकिरणबाट आज (मंगलबार) विदा भएर निस्केका छन् ।
यसैबीच, घिसिङले आज नै कार्यभार सम्हाल्ने तयारी भए पनि औपचारिक पत्र नपाएकाले कार्यभार सम्हाल्ने कार्यक्रम रोकिएको बताइएको छ ।
सम्भवतः घिसिङले भोलि (बुधबार) कार्यभार सम्हाल्नेछन् ।
दीप प्रज्वलन
घिसिङलाई नेपाल विद्युत प्राधिकरणको कार्यकारी निर्देशका दोस्रो पटक नियुक्त गरेको खुशीयालीमा माइतीघर मण्डलामा मंगलबार राति दीप प्रज्वलन गरिएको छ ।
