अर्घाखाँची । पहिरोले पुरिएर अर्घाखाँचीमा एक जनाको मृत्यु भएको छ । जिल्लाको पाणिनी गाउँपालिका – ५ मैदानमा पहिरोले पुरिएर एक जनाको मृत्यु भएको हो ।

मृत्यु हुनेमा पाणिनी – ६ धातिवाङ्गका ४५ वर्षीय मानबहादुर सुनार रहेको जिल्ला प्रहरी कार्यालय अर्घाखाँचीले जनाएको छ । स्थानीय मेघराज घिमिरेको घरमा प्लाष्टर गर्ने क्रममा शुक्रबार साँझ घरमाथिबाट खसेको पहिरोमा उनी पुरिएका थिए ।

पहिरो खस्दा उनी एक्लै काम गरिरहेको प्रहरीले जनाएको छ । स्थानीय बासिन्दा, प्रहरी र जेसिबी मेसिनको सहयोगले शुक्रबार राति सवा ९ बजे उनलाई मृत अवस्थामा फेला पारिएको प्रहरीको भनाइ छ ।

सुनारको शव पोष्टमार्टमका लागि आज जिल्ला अस्पताल अर्घाखाँचीमा ल्याउने प्रहरीले जनाएको छ ।