गोकर्णेश्वर नगरपालिकामा दोस्रो रास्ट्रपति रनिङ शिल्ड खेलकुद प्रतियोगिता आज(आइतबार)बाट सुरु भएको छ
नगरपालिकाभित्र रहेका संस्थागत एवं सामुदायिक स्कुलमध्ये ४१ वटा स्कुलले सहभागिता जनाएको प्रतियोगिताको आज पूर्वमन्त्री सुश्री अम्बिका बस्नेत र गोकर्णेश्वर नगरपालिकाका मेयर सन्तोष चालिसेले संयुक्त रुपमा उद्घाटन गरेका छन् ।
नगरपालिकाको वडा नम्बर २ मा अवस्थित बालसुधार माध्यमिक विद्यालयको प्रांगणमा भएको उद्घाटन समारोहमा नगरपालिकाका वडाध्यक्षहरु , जनप्रतिनिधि, सहभागी विद्यालयका प्रधानाचार्य, विधार्थी, शैक्षिक संस्थाका प्रमुखहरु, नगरपालिकाका शिक्षा एवं खेलकुद शाखाका प्रमुखलगायत स्थानीयको उपस्थिति थियो ।
प्रतियोगितामा छात्र तथा छात्रातर्फ मार्सल आर्टका र एथलेटिक्सका सम्पूर्ण खेलहरुका साथै भलिबल र कबड्डी पनि समावेश गरिएको छ ।
उद्घाटन , समापन र भलिबलका खेलहरु बालसुधार माविमा, एथलेटिक्सका सम्पूर्ण खेलहरु ओख्रेनी माविमा, मार्सल आर्ट्सका सम्पूर्ण खेल शंखडोल कबर्ड हलमा र कबड्डीका खेलहरु नेपालय पब्लिक स्कुलमा खेलाइने बताइएको छ ।
आज उद्घाटन भएको छात्रतर्फको भलिबल खेलमा अरुणोदय माविले ब्राइट जोन इन्टरनेसनल स्कुललाई २५–१० , २४–२६ र १५–९ को सेटमा हराएको छ ।
प्रतियोगिता फाल्गुन १५ गते सम्म चल्नेछ ।
