आयरल्यान्डका चर्चित क्रिकेटर केभिन ओब्राइनले यो सिजन काठमाडौं किङ्स इलाभेनबाटै एभरेस्ट प्रिमियर लिग (इपिएल) खेल्ने भएका छन् । ओब्राइनले सन् २०१८ को सिजन पनि काठमाडौंबाटै इपिएल खेलेका थिए ।
काठमाडौंले यस सिजन अनुबन्ध गरेका ओब्राइन पहिलो विदेशी खेलाडी हुन् । आगामी १ चैतबाट कीर्तिपुरस्थित त्रिवि क्रिकेट मैदानमा इपिएल सुरु हुनेछ ।
ओब्राइन आयरल्यान्डको राष्ट्रिय टोलीबाट एकदिवसीय र टी–२० विश्वकप खेलिसकेका खेलाडी हुन् । उनी ५० ओभरको विश्वकप क्रिकेटमा सबैभन्दा छिटो शतक प्रहार गर्ने खेलाडीसमेत हुन् । उनले सन् २०११ मा विश्वकपअन्तर्गत इंग्ल्यान्डविरुद्ध भएको खेलमा ५० बलमै शतक प्रहार गरेका थिए । उनको यो कीर्तिमान अझै कायम छ ।
‘केभिन विश्वस्तरीय खेलाडी हुन् । उनीसँग मैदानभित्र र बाहिर नेतृत्वदायी भूमिका निर्वाह गर्न सक्ने क्षमता छ,’ काठमाडौं किङ्स इलाभेनका प्रमुख कार्यकारी अधिकृत राजजंग थापाले भने, ‘पछिल्लो संस्करणदेखि नै उनी टोलीका महत्वपूर्ण सदस्य रहँदै आएका छन् । केभिन फेरि काठमाडौंबाट इपिएल खेल्न निकै उत्साहित छन् । हामी पनि खुसी छौँ ।’
उनकै उत्कृष्ट प्रदर्शनको योगदानमा काठमाडौंले गत संस्करणमा इपिएलको फाइनल खेलेको थियो । सो अवसरमा काठमाडौंबाट सात खेल खेलेका उनी काठमाडौंका लागि सर्वाधिक ९९० विकेट लिने खेलाडी थिए । साथै, उनी प्रतियोगिताकै सर्वाधिक रन जोड्ने खेलाडीमध्येका पनि थिए । बल र ब्याटबाट उत्कृष्ट प्रदर्शन गर्दै टोलीलाई जित दिलाउन सक्ने अलराउन्डर ओब्राइनलाई अनुबन्ध गर्दा टोलीले खुसी व्यक्त गरेको छ ।
