अन्तर्राष्ट्रिय क्रिकेट काउन्सिल (आइसीसी)ले सन् २०२१ मा भारतमा हुने टी २० विश्वकपको आयोजनाको जिम्मा खोस्ने चेतावनी दिएको छ ।
आइसीसीले बीसीसीआईलाई प्रतियोगिताका लागि भारत सरकारबाट कर छुटको व्यवस्था नमिलाएको भन्दै यस्तो चेतावनी दिएको हो । यदि समयमा नै त्यो निर्णय गर्न नसकेको खण्डमा विश्वकप आयोजनाको जिम्मा अर्को देशलाई दिने पनि आइसीसीले जनाएको छ ।

पछिल्लो दुई महिनादेखि आइसीसी र बीसीसीआईबीच यही विषयमा गम्भीर छलफल भएको बताइएको छ । एक साताअघि नै बीसीसीआईले कर छुटको अनुमति लिएर आइसीसीलाई पत्राचार गर्ने बताएपछि अझै त्यो काम नभएपछि बीसीसीआई रुष्ट भएको हो । यो विषयमा अझै कहिले टुंगो लाग्ने हो त्यो भने यकिन छैन । पछिल्लो पटकको कुराकानीमा बीसीसीआईले कोरोनाका कारण जुन ३० तारिखसम्मको समय माग गरेको थियो । तर त्यसलाई आइसीसीले अस्वीकृत गरेको छ ।

आइसीसीले अप्रिल २९ मा बीसीसीआईलाई पठाएको इमेलमा भारत र आइसीसीको व्यापार कर्पोरेसनबीच भएको सम्झौता पालना नभएको र यदि त्यसलाई कायम नराखेमा सम्झौता रद्द गर्ने बताएको थियो ।

करका विषयमा बीसीसीआई र आइसीसीबीच विवाद भएको यो पहिलो पटक भने होइन । यसअघि सन् २०१६ मा भएको टी २० विश्वकपमा पनि कर छुट नभएका कारण आइसीसीले करिव ३० मिलियन डलर घाटा ब्यहोर्नु परेको थियो । भारतमा सन् २०२१ को टी २० र २०२३ को एकदिवसीय विश्वकपमा कर छुटको व्यवस्था नगरे दुवै विश्वकप सार्ने चेतावनी आइसीसीले सन् २०१८ मा पनि दिएको थियो ।

टी २० विश्वकपमा कर छुट भएन भने आइसीसीलाई एक सय मिलियन डलर नोक्सान हुने अनुमान छ ।