यूईएफए युथ लिगकाे उपाधि  स्पेनिस क्लब रियल म्याड्रिडले जितेकाे छ । मंगलबार राति नियोनमा भएको फाइनलमा बलियो पोर्चुगिज क्लब बेन्फिकामाथि ३–२ को जित निकाल्दै म्याड्रिड पहिलोपटक युथ लिग च्याम्पियन बनेको हो ।

रियलका लागि रोड्रिग्वेज र गुइटिरेजले गोल गर्दा एक गोल उपहार पाएको थियो । खेलकाे २६औं मिनेटमा रोड्रिग्वेजको गोलबाट रियलले खेलमा अग्रता बनाएको थियो । पहिलो हाफको इन्ज्युरी समयमा हेनरिक जोकुले आत्मघाती गोल गरेपछि रियलले पहिलो हाफमा २–० को अग्रता बनाएको थियो ।

४९औं मिनेटमा गोन्कालो रामोसले गोल गर्दै बेन्फिकालाई खेलमा फर्काए । तर, त्यसो एक मिनेटपछि नै गुइटिरेजले गोल गर्दै रियललाई खेलमा ३–१ ले अघि बढाए । ५७औं मिनेटमा गोन्कालोले अर्काे गोल थप्दै खेललाई ३–२ को स्थितिमा ल्याए । त्यसपछि दुवैतर्फबाट कुनै गोल हुन नसकेपछि रियलले उपाधिमाथि पहिलाे पटक कब्जा जमाएकाे हाे ।