इन्डियन प्रिमियर लिग (आइपिएल) को ३५ औं खेलमा कोलकाता नाइट राइडर्सले सनराइजर्स हैदराबादलाई सुपर ओभरमा पराजित गरेको छ ।
सुपर ओभरमा कोलकाताले सानदार सुरुवात पाएको थियो । लोकी फर्गुसनले पहिलो बलमा नै डेविड वार्नरलाई बोल्ड गर्दै उत्कृष्ट सुरुवात दिलाए । दोस्रो बलमा अब्दुल सामादले २ रन जोडे । तर तेस्रो बलमा फर्गुसनले सामादलाई पनि बोल्ड गर्दै टोलीलाई नै मात्र २ रनमा सिमित गरे ।
कोलकाताका लागि कप्तान ओइन मोर्गन र दिनेश कार्तिक ब्याटिङमा आएका थिए । राशिद खानको बलमा मोर्गनले पहिलो बल डट खेले । दोस्रो बलमा उनले सिंगल लिए । तेस्रो बल पनि डट भयो । चौथो बलमा लेग बाइमा २ रन जोडेपछि कोलकाता विजयी भयो ।
यसअघि जितका लागि १६४ रनको विजयी लक्ष्य पछ्याएको हैदराबादले २० ओभरमा ६ विकेटको क्षतिमा १६३ रन बनाएपछि खेल सुपर ओभरमा पुगेको थियो ।
जारी आइपिएलमा दिल्ली क्यापिटल्स ९ खेलमा ७ मा जित र २ मा हार सहित १४ अंकका साथ शीर्षस्थानमा छ । मुम्बई ८ खेलमा ६ मा जित र २ मा हार सहित १२ अंक जोड्दै दोस्रो स्थानमा छ । बेंगलोर ९ खेलमा ६ मा जित र ३ मा हार सहित १२ अंक भएपनि नेट रनरेटको आधारमा तेस्रो स्थानमा छ । कोलकाता ९ खेलमा ५ मा जित र ४ मा हार सहित चौथो स्थानमा छ ।
सनराइजर्स हैदराबाद ९ खेलमा ६ मा हार र ३ मा जित सहित पाँचौ स्थानमा छ । चेन्नई सुपर किंग्स ९ खेलमा ६ मा हार र ३ मा जित सहित छैटौं स्थानमा छ । राजस्थान ९ खेलमा ६ मा हार र ३ मा जित सहित सातौं स्थानमा छ । किंग्स इलेभेन पन्जाब ८ खेलमा ६ मा हार र २ मा जित सहित पुछारमा छ ।
