एजेन्सी । पहिलो मिनेटमै गोल गरे पनि टोटनह्याम जितबाट वन्चित भएको छ । विपक्षीबाट अन्तिम समयमा खाएको गोलले सुरुमा लिएको अग्रताबाट टोटनह्याम वञ्चित भयो । इंग्लिस प्रिमियर लिग फुटबल अन्तर्गत आइतबार राति भएको खेलमा टोटनह्याम वुल्भ्ससँग १–१ को बराबरीमा रोकिएको छ ।
अवे मैदानमा भएको खेलमा टोटनह्याम पहिलो मिनेटमा टांगाइ डोम्बेलेले गरेको गोलबाट अग्रता लिन सफल भयो । तर अन्तिम समयमा गोल खाएर जोसे मोरिन्होको टिम जितबाट वञ्चित भयो ।
घरेलु टोली वुल्भ्सका लागि रोमाइन साइसले हेट मार्फत ८६ औँ मिनेटमा बराबरी गोल गरेका हुन् । बराबरीपछि पाँचौँ स्थानमा पुगेको टोटनह्यामको १५ खेलबाट २६ अंक भएको छ । समान १५ खेलबाट २१ अंकसहित वुल्भ्स ११ औँ स्थानमा छ ।
लिगअन्तर्गत आइतबार राति भएका अरु खेलमा लीड्स युनाइटेडले बर्नलीलाई १–० ले पराजित गर्दा वेष्ट ह्याम र ब्राइटनले २–२ को बराबरी खेलेका छन् ।
