प्रधानमन्त्री कप एकदिवसीय राष्ट्रिय पुरुष क्रिकेट प्रतियोगितामा विभागीय टोली त्रिभुवन आर्मी क्लबले लगातार तेस्रो जित निकालेको छ। बुधबार मुलपानी क्रिकेट मैदानमा भएको खेलमा आर्मी प्रदेश १ माथि ४ विकेटले विजयी भएको हो।
प्रदेश १ ले दिएको १३२ रनको लक्ष्य आर्मीले २९.५ ओभरमा ६ विकेट गुमाएर भेट्टायो । आर्मीको जितमा रोहितकुमार पौडेलले ३१ बलमा ४ चौका र २ छक्का हिर्काउँदै सर्वाधिक ३६ रन बनाए ।
यसअघि टस जितेर पहिले ब्याटिङ गरेको प्रदेश १ ले ४० ओभर १ बलमा अलआउट हुँदै १३१ रन बनाएको थियो । उसका लागि विवेक मेहेताले ८३ बलमा ७ चौका र १ छक्काको मद्दतमा सर्वाधिक ५० रनको अर्धशतकीय पारी खेले ।
यता विभागीय टिम नेपाल पुलिस क्लबले पहिलो जित निकालेको छ । कीर्तिपुरस्थित टियु क्रिकेट मैदानमा बुधबार भएको खेलमा सुदूरपश्चिम प्रदेशलाई ९ विकेटले पराजित गर्दै पुलिसले पहिलो जित निकालेको हो ।
सुदूरपश्चिमले दिएको १११ रनको समान्य लक्ष्य पुलिसले १७ ओभरमा मात्र १ विकेट गुमाएर पुरा गर्यो । पुलिसको जितमा सुनिल धमलाले ५३ रनको अर्धशतकीय इनिङ्स खेले ।
यस्तै कुशल भुर्तेलले अविजित रहदै ५१ रनको अर्धशतकीय इनिङ्स खेले । पहिलो विकेटका लागि सुनिल र कुशलले ९७ रनको साझेदारी गरेका थिए ।अमित श्रेष्ठ १ रनमा अविजित रहे । सुदूरपश्चिमका हेमन्त धामीले १ विकेट लिए ।
यसअघि टस हारेर पहिले ब्याटिङ गरेको सुदूरपश्चिम ३३ ओभर १ बलमा अलआउट हुँदै ११० बनाएको थियो । सुदूरपश्चिमका लागि खडक बोहोराले सर्वाधिक ४० रन बनाए । यस्तै सन्जु धामीले ३५ रन जोडे ।
पुलिसका दिपेन्द्र सिंह ऐरी र सागर ढकालले ४/४ विकेट लिए । जितसंगै पुलिसले २ खेलमा २ अंक जोडेको छ ।
