इंग्लिस प्रिमियर लिगमा म्यानचेस्टर युनाइटेडले ९ खेलाडीमा समेटिएको साउथह्याम्टनमाथि ९–० को सानदार जित हात पारेको छ ।
मंगलबारराति भएको खेलकाे दोस्रो मिनेटमै अलेक्जेन्ण्डर जान्किटजले रातो कार्ड खाएपछि साउथह्याम्टन १० खेलाडीमा सीमित भएको थियो । एलेसान्द्रे जान्कीविट्जले स्टक म्याकटोमिनेमाथि खराव ट्याकल गरेपछि रेफ्रीले उनलाई सिधै रातो कार्ड देखाएर मैदान बाहिर पठाएका थिए ।
१८औं मिनेटमा आरोन वान बिशाखाले गोल गर्दै युनाइटेडलाई १–० ले अघि बढाए । २५औं मिनेटमा मार्कुस रासफोर्डले गोल गर्दै अग्रता दोब्बर पारे ।
३४औ मिनेटमा जान बेडनारेकले आत्मघाती गोल गरेपछि युनाइटेडले खेलमा ३–० को अग्रता लियो । ३९औं मिनेटमा इडिन्सन काभानीले गोल गर्दै युनाइटेडलाई पहिलो हाफमा ४–० को अग्रता दिलाए ।
६९औं मिनेटमा एन्थोनी मार्सियालले ब्रुनो फर्नान्डेसको पासमा गोल गर्दै खेललाई ५–० ले अघि बढाए । ७१औं मिनेटमा स्कट म्याकटोमिनेले गोल गर्दै युनाइटेडलाई फराकिलो जिततर्फ अभघि बढाए ।
८६औं मिनेटमा जान बेडनारेकले मार्सियालमाथि पेनाल्टी बक्समा फल गरेपछि सिधै रातो कार्ड खादै मैदानबाट बाहिरिएपछि साउथह्याम्टन ९ खेलाडीमा समेटिन पुग्यो ।
त्यसपछि युनाइटेडले थप तीन गोल गरेको थियो । त्यसमै प्राप्त पेनाल्टीमा ब्रुनो फर्नान्डेसले गोल गरे । ९०औं मिनेटमा मार्सियालले व्यक्तिगत दोस्रो तथा टोलीका लागि आठौं गोल गर्दै युनाइटेडलाई ८–० ले अघि बढाए ।
इन्ज्युरी समयको थप गरिएको तेस्रो मिनेटमा ब्रुनो फर्नान्डेसको पासमा ड्यानियल जेम्सले गोल गर्दै युनाइटेडलाई ९–० को फराकिलो जित दिलाए
जितसँगै युनाईटेड २२ खेलबाट ४४ अंकसहित दोस्रो स्थानमा छ । दुई खेल कम खेलेको म्यानचेष्टर सिटी समान ४४ अंकका साथ गोल अन्तरका आधारमा शीर्ष स्थानमा छ । तेस्रो स्थानको लिभरपुलको भने ४० अंक छ ।
