काठमाडौं । राष्ट्रिय क्रिकेट टिमका मुख्य प्रशिक्षक डेभ वाट्मोरले राजीनामा दिएका छन् ।
वर्ल्ड क्रिकेट लिग टूको त्रिकोणात्मक सिरिज खेल्न ओमान पुगेका उनले इमेलमार्फत नेपाल क्रिकेट संघ (क्यान) लाई राजीनामा बुझाएका हुन् ।
क्यान सचिव अशोकनाथ प्याकुरेलले मुख्य प्रशिक्षक वाट्मोरले राजीनामा दिएको पुष्टि गरे ।
उनले व्यक्तिगत कारणले राजीनामा दिएको इमेलमा उल्लेख गरेका छन् ।
महामारीको अवस्थामा आफूले परिवारलाई समय दिने भन्दै उनले क्यानलाई इमेल लेखेका छन् । साथै उनले नेपाली क्रिकेट टिमको प्रशिक्षक भएर काम गर्दा पाउँदा खुसी लागेको पनि लेखेका छन् ।
ओमान र अमेरिकासितको विश्वकप लिग–२ अन्तर्गतको त्रिकोणात्मक क्रिकेट सिरिज खेल्न नेपाली टोली ओमानमा छ ।
सिरिज भदौ २८ देखि असोज ४ गतेसम्म सञ्चालन हुनेछ ।
त्रिकोणात्मक सिरिजमा नेपालले ओमान र अमेरिकासँग दुई-दुई खेल खेल्नेछ । सो सिरिजपछि वाटमोरले नेपाली टिम छाड्नेछन् ।
यसअघि उनी गत पुसमा नेपाली टिमको प्रशिक्षकमा नियुक्त भएका थिए ।
श्रीलंकामा जन्मिएर अस्ट्रेलियामा हुर्किएका वाटमोर अस्ट्रेलियाका पूर्व क्रिकेटर हुन् ।
