साफ च्याम्पियनसिपको आफ्नो पहिलो खेलमा भारत बंगलादेशसँग रोकिएको छ । साेमबार साँझ भएको खेलमा सात पटकको च्याम्पियन भारत १० खेलाडीमा सीमित बंगलादेशसँग १-१ गोल अन्तरको बराबरी खेल्दै अंक बाँड्न बाध्य भएको हो ।
भारतले सुरुवाती अग्रता जोगाउन नसक्दा अंक बाँड्न बाध्य भयो । भारतका लागि कप्तान सुनिल क्षेत्रीले २६ मिनेटमा गोल गर्दै अग्रता दिलाएका थिए ।
खेलको ७४ मिनेटमा बंगलादेशका यासिन अराफ्तले बराबरी गोल गरेका थिए । दोस्रो हाफको ५४ मिनेटमा बंगलादेश १० खेलाडीमा सीमित भएको थियो । बंगलादेशका विश्वनाथ घोसले सिधै रातो कार्ड बेहोरे ।
भारतका लिस्टन कोलाकोलाई ट्याकल गरेपछि रेफ्री अल सम्रानी मदिज मोहम्मदले घोसलाई सिधै रातो कार्ड देखाए ।
खेलसँगै बंगलादेशले दुई खेलबाट ४ अंक जोड्दै शीर्षस्थानमा रहेको छ । भारत एक खेलबाट १ अंकसहित तेस्रो स्थानमा छ ।
एक खेलमा १ जितसहित नेपाल दोस्रो स्थानमा छ ।
आजै हुने दोस्रो खेलमा नेपालले श्रीलंकाको सामना गर्दै छ । खेल राति पौने १० बजे सुरु हुनेछ ।
