अन्तर्राष्ट्रिय नागरिक उड्डयन संगठन (आइकाओ) काउन्सिलले दोहा उडान सूचना क्षेत्र (एफआइआर) र दोहा सर्च एन्ड रेस्क्यु क्षेत्र (एसआरआर) स्थापना गर्न कतार सरकारले गरेको प्रस्तावलाई सैद्धान्तिक सहमति दिएको छ ।
आइकाओको सहमतिसँगै कतारले आफ्नो सार्वभौम एयरस्पेस र क्षेत्रीय एयरस्पेसको सुरक्षा र दक्षता वृद्धि गर्नुका साथै उच्च समुद्री तटमा रहेको अन्य अन्तर्राष्ट्रिय एयरस्पेस समावेश गरी आफ्नो क्षमता बढाउन पाउने भएको छ ।
आइकाओ काउन्सिलको २ सय २३औँ बैठकले कतार सरकारको प्रस्तावलाई अनुमोदन गरेको हो । आइकाओले कतारको प्रस्तावलाई सिकागो कन्भेन्सनले तय गरेको अनुच्छेद नम्बर १ तथा काउन्सिल महासभाको रिजोलुशन ४० को ४ ले दिएको अधिकार प्रयोग गरेर अनुमोदन गरेको जनाएको छ ।
प्रस्ताव मार्फत कतारले यस क्षेत्रकै हवाई उडानलाई सुरक्षित तथा दिगो बनाउने उद्देश्य लिएको छ । जसले विश्वकै हवाई क्षमता विस्तार तथा विकास गर्न मद्दत पुग्ने विश्वास आइकाओले लिएको छ ।
आइकाओले हवाई उडान तथा हवाई क्षेत्र सुरक्षित गर्ने विषयलाई देशहरूबीचको आपसी सम्बन्ध, सहकार्य तथा सम्मानमा समेत निर्भर रहने बताएको छ । प्राविधिक रूपमा समेत यो प्रस्तावको परीक्षण गरिने कुराको विश्वास आइकाओले दिलाएको छ ।
कतार हवाई उडान क्षेत्रको सुरक्षा, एयर ट्राफिक नियन्त्रण तथा सेवा सुविधा प्रदान गर्न सक्षम रहने वा नरहने विषयको जाँच गरिने आइकाओले जनाएको छ । साथै आइकाओले बहराइनले दशकौँदेखि सुरक्षित हवाई उडान सञ्चालन गरिरहेको स्वीकार गरेको छ ।
आइकाओले बहराइन र कतार सँगसँगै अन्य छिमेकी राष्ट्रलाई वार्ता र सहकार्यको माध्यमबाट हवाई क्षेत्र सुरक्षामा सजग रहन आह्वान गरेको छ ।
कतार सरकारले आइकाओमा सदस्य रहेका सबै राष्ट्रहरूको असाधारण सहयोगका कारण कतारले हिम्मत गर्न सकेको जनाएको छ ।
कतारका यातायात तथा सञ्चार मन्त्री जासिम विन सैफ अलसुलैतीले प्रस्तावबाट कतार मात्रै नभएर गल्फ देशहरूले नै फाइदा उठाउन सक्ने विश्वास व्यक्त गरेका छन् ।
उनले कतारले सिकागो सहमति तथा आइकाओ काउन्सिल रेजुलेसनको सम्मान गर्दै हवाई क्षेत्र सूचना तथा खोजी र उद्धार क्षेत्र स्थापना कार्यलाई प्राथमिकता दिने बताए ।
