काठमाडौं । बाँकेमा उत्पादित तरकारीले बजार नपाउँदा किसान मर्कामा परेका छन् ।
लकडाउनका कारण उत्पादित तरकारी सस्तो मूल्यमा बिक्री गर्न बाध्य हुँदा किसान मर्कामा परेका हुन् ।
बाँके कोहलपुरका किसान किसान लक्ष्य खड्काले बजारसम्म आफ्नो पहुँच नभएको, र खेतबारीमै तरकारी लिन आएका व्यपारीलाई सस्तो मूल्यमा तरकारी बेच्दा आफूहरु मर्कामा परेको बताए ।
‘सरकारले तरकारी किसानलाई आवतजावतमा कडाइ गरेकाले हामीजस्ता तरकारी किसान मर्कामा परेका छौँ,’ उनले भने ।
त्यस्तै, कृषि ज्ञान केन्द्र बाँकेका प्रमुख सागर ढकालले बन्दाबन्दीका कारण बिक्रीका लागि थोक बजारसम्म तरकारी पुर्याउन नसकेकाले किसान मर्कामा परेको बताए ।
किसानलाई नेपालगन्ज आसपासका तरकारी थोक बजारमा बिक्री सहज भए पनि किसानले उत्पादित तरकारी कोहलपुर, बैजानाथ, नरैनापुर र राप्तीसोनारीको बजार पठाउन समस्या हुँदा किसान मर्कामा परेका हुन् ।
नेपालगन्जमा तरकारीको थोक बजार खुला भए पनि कोहलपुरको थोक तरकारी बजार बन्द छ ।
बन्दाबन्दीमा किसानसँग आवतजावतको ‘पास’ नहुँदा बजारमा तरकारी बिक्री गर्न ल्याउन नसकिएको र यस सम्बन्धमा प्रशासनसँंग पहल भइरहेको प्रमुख ढकालले बताए ।
