मोरङ । मोरङ प्रहरीले भन्सार छली अवैध रुपमा भित्र्याइएको १ लाख ६२ हजार रुपैयाँ बराबरको लत्ताकपडा बरामद गरेको छ ।
जिल्ला प्रहरी कार्यालय मोरङका प्रवक्ता प्रहरी नायब उपरीक्षक मानबहादुर राईका अनुसार शनिबार राति पौने ८ बजे विराटनगर महानगरपालिकाको सरोचियाबाट सो मूल्यको अवैध कपडा बरामद गरेको हो ।
महानगरपालिका–६ सरोचियास्थित २४ वर्षीय आशिफ खानको घरमा भन्सार छलेर संग्रह गरी राखिएको अवस्थामा कपडा बरामद गरिएको प्रवक्ता राईले जानकारी दिए ।
पछिल्लो समय प्रहरीले भन्सार छली र अवैध रुपमा कारोबार गर्दै आएको सरसमान नियन्त्रण गर्ने क्रमलाई तीव्रता दिएको छ ।
शनिबार राति खानको घरबाट २ सय ४० थान स्वीटर, ८४ थान सुरुवा र १५ थान कुर्ता बरामद गरेको हो । पक्राउ परेका खानलाई कारवाहीका लागि कपडासहित भन्सार कार्यालय रानीमा बुझाउने प्रवक्ता राईले जानकारी दिए ।
गत शुक्रबार प्रहरीले महानगरपालिका ७ स्थित तरुणकुमार रौनियारको गोदामबाट भन्सार छली राखिएको ३३ लाख ४१ हजार रुपैयाँ बराबरको कपडा बरामद गरेको थियो ।
