गोपीकृष्ण मुभिज अहिले नयाँ चलचित्र ‘पर्खी बसेँ २’ निर्माणको तयारी गरिरहेको छ । चलचित्रलाई सौरभ चौधरीले निर्देशनको तयारी गरिरहेका छन् । सौरभ कै कथा रहने चलचित्रमा सुशिल पौडेलको लेखन रहने छ ।
निखिल उप्रेती, राजबल्लब कोइराला, यूना उप्रेती लगायतको अभिनय रहेको पर्खी बसेँको सिक्वोलमा को कलाकार रहने भन्ने चासोको विषय बनिरहेको छ । यस्तैमा निर्माण पक्षले नायिका पूजा शर्मा र नायक आकाश श्रेष्ठ समक्ष चलचित्रको कुरा पुर्याएको छ ।
चलचित्रको लागि पूजा र आकाश तयार पनि भइसकेका छन् । निर्माण पक्ष चलचित्रको लागि पल शाहसँग पनि कुरा गर्ने तयारीमा रहेको बुझिएको छ ।
चलचित्रमा दुई नायक र एक नायिका रहने छन् । यो अहिलेलाई तयार भएको लाइनअप हो । तर, निर्माण पक्ष यस लाइनअपलाई फेर्न सक्ने पक्षमा छ ।
बुझिए अनुसार, निर्देशक चौधरी चलचित्रमा प्रदीप खड्कालाई पनि भित्राउन चाहान्छन् । प्रदीपले चलचित्र स्विकारे आकाश हट्नेछन् ।
तर, पूजा र प्रदीपको विवादका कारण उनीहरुलाई सँगै काम गराउन निर्देशकलाई चुनौतीकै विषय रहेको छ । जे होस्, यस चलचित्रको लाइनअप राम्रो र बलियो बनाउने सुरमा निर्देशक लागि परेका छन् ।
