नायिका रेखा थापा नयाँ चलचित्र निर्माणको तयारीमा लागेकी छिन् । रेखाले आफ्नै व्यानर 'रेखा फिल्मस्'को प्रस्तुतीमा छैटौँ चलचित्र निर्माण गर्न लागेकी हुन् ।
नाम तय नभएको यस चलचित्रको लागि कलाकार भने पक्का भइसकेका छन् । चलचित्रको लागि दयाहाङ राई र सौगात मल्ल पक्का भएका छन् । यस चलचित्रमा रेखासँग दयाहाङ र सैगातले जोडी बाध्नेछन् ।
एक्सन जनरामा निर्माण हुन लागेको चलचित्रलाई सविर श्रेष्ठले निर्देशन गर्नेछन् । चलचित्रको पटकथा जगदीश्वर थापाले लेखिरहेका छन् । नयाँ वर्ष तीर छायांकनमा जाने यस चलचित्रले आगामी लक्ष्मी पूजालाई रिलिज लक्ष्य राखेको छ ।
दयाहाङ र सौगातलाई पछिल्लो पुस्ताका कलाकार मानिन्छ । रेखा अघिल्लो पुस्तामा कहलिन्छिन् । दुई पुस्ताको फ्युजन र अनुभवी निर्देशकको टिमअपले केही नयाँ र उत्कृष्ट नतिजा निस्किने रेखाले बताएकी छिन् ।
