चलचित्र ‘सेल्फी किङ्ग’मा समावेश गीत सार्वजनिक भएको छ । मंगलबार युट्युब मार्फत् ‘जिन्दगीको के छ र भर’ बोलको गीत सार्वजनिक गरिएको हो । उक्त गीतको लिरिकल भिडियोमात्र सार्वजनिक गरिएको छ । 

सार्वजनिक उक्त गीतमा सुभाष भुषालको संगीत रहेको छ । सुरज गैरेको शब्द रहेको गीतमा केतन क्षेत्रीको स्वर सुन्न सकिन्छ । गीतले कलाकार भएपछि भोग्नु परेको दुःख, पारिवारिक विछोड, दुखी जीवन जस्ता कुरालाई देखाएको छ ।

माघ २४ गतेबाट रिलिज हुने यो चलचित्रमा विपिन कार्की सेल्फी किङ्ग बनेका छन् । विपिनसँगै चलचित्रमा लक्ष्मी वर्देवा, भूवन चन्द, अभय बराल, लोकमणी सापकोटा, जीवन भट्टराई लगायतको मुख्य भूमिका छ ।

विशाल सापकोटाको लेखन तथा निर्देशन रहेको  चलचित्रलाई दिनेश राउत र सुभाष थापाले संयुक्त रुपमा निर्माण गरेका हुन् । चलचित्रमा प्रवल कोइराला र राजेश विसुराल सह–निर्माता छन् ।