गोरखा भूकम्पबाट क्षतिग्रस्त दोलखाको राजकुलेश्वर निम्न माध्यमिक विद्यालय भवन पुनर्निर्माणमा सहयोग जुटाउन भृकुटीमण्डपमा साङ्गीतिक कार्यक्रम आयोजना गरिने भएको छ ।
भूकम्पले क्षतिग्रस्त भवन बनाउन चर्चित साङ्गीतिक समूह नेपथ्यले फागुन १७ गते काठमाडौंमा विशेष कार्यक्रम गर्न लागेको हो । हेल्प नेपाल नेटवर्कसँगको सहकार्यमा ‘शिक्षाका लागि सङ्गीत’ नाम दिइएको सो कार्यक्रम भृकुटीमण्डप बगैँचामा आयोजना गरिनेछ ।
भूकम्पपछि सिन्धुपाल्चोकको ठोकर्पा माध्यमिक विद्यालयलगायत विभिन्न जिल्लाका विद्यालय भवन पुनर्निर्माण गर्न सघाएको हेल्प नेपालका कार्यक्रम संयोजक रोशेन्द्रध्वज खड्काले बताए। दोलखाको भीमेश्वर नगरपालिकास्थित राजकुलेश्वर निम्न माध्यमिक विद्यालय भवनको पुननिर्माण सुरु भइसकेको छ ।
र्
पूर्वाधार राम्रो हुँदा बालबालिकाको पठनपाठनमा पनि राम्रो प्रभाव पर्ने भएकाले अरु जिल्लाका लागि पनि नमुना हुने गरी विद्यालय पुनर्निर्माण गराउने हेल्प नेपालले जनाएको छ । कार्यक्रममा चर्चित गायक अमृत गुरुङलगायत कलाकारले प्रस्तुति दिने जनाइएको छ ।
कार्यक्रमका लागि अग्रिम बुकिङ गर्नेलाई टिकटको मूल्य रु ९०० राखिएको छ । कार्यक्रमको दिन भने टिकटको मूल्य प्रतिव्यक्ति रु एक हजार २ सय ५० पुग्ने हेल्प नेपाल नेटवर्क नेपाल शाखाका अध्यक्ष अरुणसिंह बस्नेतले सुनाए ।
‘मातृभूमिका लागि महिनामा एक पाउन्ड वा एक डलर’ भन्ने आह्वान गर्दै २० वर्षअघि बेलायतमा सो नेटवर्क स्थापना गरिएको हो । हेल्प नेपाल नेटवर्कले नेपालमा शिक्षा, स्वास्थ्य, आपत्कालीन मानवीय सहायतालगायतका क्षेत्रमा सहयोग पुर्याउँदै आएको छ ।
–––
