वरिष्ठ कलाकार जयनन्द चन्द ठकुरीको निधन भएको छ । आइतबार बिहान आफ्नै घर बागडोलमा उनको निधन भएको हो । उनले बिहान ११ बजेर २० मिनेटमा आफ्नो प्राण त्यागेका थिए ।
जयनन्दको आजै पशुपति आर्यघाटको विद्युतिय शव गृहमा अन्त्येष्टी गरिने चलचित्र कलाकार संघका अध्यक्ष रविन्द्र खड्काले बताए ।
जयनन्द लामो समयदेखि प्यारालाइसिसका कारण थला परेका थिए । उनलाई सुगर र प्रेसरको रोग पनि थपिएको थियो । उनी बागडोलमा आफ्नो छोरीको साथमा बस्दै आएका थिए ।
चलचित्र ‘जीवन रेखा’बाट डेब्यु गरेका जयनन्द चन्दले लगभग १०० चलचित्रमा अभिनय गरेका छन् । उनले टेली चलचित्र, म्युजिक भिडियोमा पनि अभिनय गरेका छन् ।
विश्वास, भाग्य रेखा, फेरि भेटौँला, मायालु, युद्धलगायतका थुप्रै चलचित्रमा चरित्र अभिनेताको भूमिका निर्वाह गरेका चन्दले भारतीय चलचित्र पञ्चओटी तथा पाकिस्तानी एक चलचित्रमा समेत अभिनय गरेका छन् ।
