चलचित्र 'प्रेम गीत ३' गत वर्ष नै रिलिज हुने पक्का थियो । चलचित्रले यस नयाँ वर्षलाई लक्षित गर्दै गत वर्षको चैत २८ लाई रिलिज मिति तोकेको थियो । तर, कोरोनाका कारण चलचित्र रिलिज हुन पाएन ।
चलचित्रको प्रचार स्वरुप विभिन्न सामाग्रीहरु सार्वजनिक भइरहेका थिए । यस्तैमा, ३ महिना अगडि निर्माण पक्षले चलचित्रको एक गीत 'हर युग' सार्वजनिक गरेको थियो । जुन गीतलाई अहिले युट्युबमा निकै रुचाइएको छ ।
एलिश कार्कीले संगीत भरेको यस गीतमा प्रताप दास र प्रविशा अधिकारीको आवाज रहेको छ । गीतको शब्द राजेश कुमार श्रेष्ठले लेखेका हुन् ।
रिलिज भएको छोटो समयमा नै यस गीतले युट्युबमा ७० लाख भन्दा बढि भ्युज कमाएको छ । छोटो समयमा नै लिरिकल भिडियोले ७० लाख भ्युज पाउनेमा यस गीतले रेकर्ड बनाएको चलचित्रका निर्माता सन्तोष सेनले बताएका छन् ।
चलचित्रको गीतलाई दर्शकले रुचाएको सन्तोषले खुसी ब्यक्त गर्दै सामाजिक संजालमार्फत् धन्यवाद दिएका छन् । उनले चलचित्रलाई दर्शकले प्रतिक्षा गर्नु परेको तर, प्रतिक्षाको फल पक्कै मिठो हुने समेत लेखेका छन् ।
सन्तोष सेन र छेतेन गुरुङले संयुक्त रुपमा निर्देशन गरेको यस चलचित्रमा प्रदीप खड्का, कृष्ट्रिना गुरुङ, शिव श्रेष्ठ, सुनिल थापा, मनिष राउत, पुस्कर कार्की, सन्तोष सेन, अनुभव रेग्मी लगायतको मुख्य भूमिका रहेको छ । ५ करोड हाराहारीको लगानी रहेको यस चलचित्रलाई राजेश श्रेष्ठले सम्पादन गरेका छन् ।
