तीजको सन्दर्भ पारेर अघिल्लो वर्ष निकालिएको गीत ‘बीच्च बीच्च’मा सुपरहिट भएपछि गायक तथा मोडल दुर्गेश थापाले त्यसको ‘पार्ट टु’ निकालेका छन् । ‘बीच्च बीच्च २ ( एउटा फोटो खिच)’ नाम दिइएको गीत दुर्गेशले आफ्नै युटुव च्यानलबाट बिहीबार सार्वजनिक गरेका हुन् । केही फरक प्याट्रनमा निर्माण भएकाले पनि दुर्गेशको गीत धेरैको रोजाइमा परेको थियो । त्यसैलाई निरन्तरता दिँदै उनले सिक्वेल निकालेका हुन् ।
विश्वव्यापी कोरोना महामारीका कारण भोग्नु परेको सङ्कटलाई गीतमा उतारिएको छ । दुर्गेशले गीतमा श्रीमतीलाई अघिल्लो वर्षकै तीजको साडी लगाएर फोटो खिच्न आग्रह गरेका छन् ।
कोरोनाबाट बच्न गरिएको लकडाउनले आर्थिक सङ्कट भोग्न बाध्य भएकाले आम्दानी नभएको कथा गीतमा समावेश छ । जुन आम सर्वसाधारणको जनजीवनमा मेल खाने खालको छ । सोही कारण यस पटकको तीज ‘माछामाछा भ्यागुतो’ भएको भन्दै उनले टिप्पणी गरेका छन् ।
गीतमा गायक दुर्गेशलाई अर्का उदाउँदा कलाकार जीबी चिरनले राम्रो साथ दिएका छन् । कोरोना सङ्कटको बीचमा ‘भाग कोरोना भाग’ र्याप गीत गाएर चर्चामा आएका जीबी चिरन पछिल्ला समय केही सिरियलहरूमा समेत देखिँदै आएका छन् । उनै जीबी चिरन र जीवन सहनीले दुर्गेशलाई भिडियोमा साथ दिएका छन् ।
भिडियोको अर्को रोचक पक्ष भने एकै पटक सात–सात जना मोडललाई समेत नचाइएको छ । सारिका केसी, दिपाशा बिसी, अस्मिता जुरेली, टिका जैसी, सबिता राई, एनी विष्ट, र शिल्पा खड्काले नाचेर भिडियोलाई झनै रोचक बनाएका छन् । अस्मिता जुरेली नेपालको दोस्रो महिला रेस्लर समेत हुन् ।
चर्चित निर्देशक शिव विकले भिडियोको निर्देशन गरेका हुन् । भिडियोमा अर्जुन तिवारीको छायाङ्कन, मिलन विश्वकर्माको सम्पादन र रङ्ग संयोजन छ । गीतमा गायक तथा मोडल दुर्गेश, राम खत्री र राजन कार्कीको शब्द तथा दुर्गेशकै सङ्गीत छ । साहस शाक्यको एरेन्ज तथा प्रकाश मिश्रको मिक्सिङ र मास्टरिङ गीत तयार भएको हो ।
