एसिया मोडल फेस्टिभलअन्तर्गत फेस अफ एसिया २०२० मा नेपाली विवेक खड्का उत्कृष्ट १३ मा पर्न सफल भएका छन् । उनी सो स्थानमा पर्न सफल भएसँगै प्रतियोगिताको उत्कृष्ट १३ भित्र नेपाल पहिलो पटक पर्न सफल भएको हो ।
साउथ कोरियाबाट विगत १५ वर्षदेखि नियमित आयोजना हुँदै आएको सो प्रतियोगितामा नेपालका तीन सहभागीमध्ये उनी उत्कृष्ट १३ भित्र पर्न सफल भएका हुन् ।
नेपाल, भारत, चीन, कोरियालगायत २६ देशका ७८ सहभागी प्रतियोगितामा रहेका थिए । कोरोनाको कारण यो पटक भर्जुअल रुपमा आयोजना भएको प्रतियोगिता विगत ७ महिनादेखि विभिन्न सेसनको रुपमा आयोजना हुँदै आएको थियो ।
डिसेम्बर ४मा सम्पन्न प्रतियोगितामा शीर्ष उपाधि क्यबाका युवकले जितेका थिए । विश्वकै चर्चित मोडलिङ प्रतियोगिता मानिने यो प्रतियोगितामा खड्काले बिभिन्न सेसेनमा नेपाली कलासंस्कृति, फेसन, ऐतिहासिक महत्व झल्कने बिभिन्न पहिरन सहितको प्रस्तुति दिएका थिए ।
‘प्रतियोगिताको शीर्ष उपाधि जित्ने उद्देश्य थियो । तर त्यो गर्न सकिएन’ खड्काले भने ‘उत्कृष्ट १३ भित्र पर्नु पनि नेपालका लागि ठुलो उपलब्धि हो ।’
