काठमाडाैं । बागलुङका गाउँपालिकामै ‘थ्रोट स्वाब’ सङ्कलन सुरु भएको छ ।
स्थानीय तहमै यस्तो सेवा सुचारु हुन थालेपछि अब बागलुङमा शङ्कास्पद बिरामीको कोरोना जाँचका लागि ‘थ्रोट स्वाब’ सङ्कलन गर्न सदरमुकामबाट स्वास्थ्य प्राविधिक पठाउनुपर्ने समस्या हटेको छ ।
स्थानीय स्वास्थ्य संस्थामा कार्यरत स्वास्थ्य प्राविधिकलाई तालिम दिएर तयार पारिएको हो ।
यहाँका १० वटै स्थानीय तहमा रहेका स्वास्थ्य प्राविधिकले कोरोना परीक्षणका लागि लिइने सो सङ्कलन गर्न सक्ने जनाइएको छ ।
कार्यालयले सदरमुकाममा रहेका केही निजी पोलिक्लिनिक, गलकोट र बडिगाड गाउँपालिकामा रहेका निजी स्वास्थ्य संस्थामा कार्यरत प्राविधिकले समेत स्वाब सङ्कलनबारे तालिम लिएको जानकारी दिएको छ ।
गण्डकी प्रादेशिक स्वास्थ्य निर्देशनालयको आयोजना र सो कार्यालयको संयोजनमा बिहीबार जिल्लाभरका ३० स्वास्थ्य प्राविधिकलाई स्वाब सङ्कलनसम्बन्धी तालिम दिइएको छ ।
उनीहरुलाई आपसी सहकार्य र सावधानीका साथ स्वाब सङ्कलन गर्ने विधिबारे जानकारी गराइएको स्वास्थ्य कार्यालयका ल्याब टेक्निसिएन डिल्ली आचार्यले जानकारी दिए ।
‘अब हरेक पालिकामा रहनुभएका प्राविधिक साथीहरुले पनि स्वाब लिन सक्नुहुन्छ,’ उनले भने, ‘संख्यामा धेरै भए जिल्लासँगको समन्वयमा काम हुन्छ ।’
कोरोना सङ्क्रमितको सम्पर्कमा आएका र भारतलगायत बाहिरी जिल्लाबाट आएका शङ्कास्पद बिरामीको स्वाब लिनुपर्ने भए सदरमुकामबाटै स्वास्थ्य प्राविधिकको टोली पठाउने गरिएको थियो ।
यसभन्दा पहिला धवलागिरि अस्पताल र स्वास्थ्य कार्यालयका प्राविधिकले मात्रै स्वाब सङ्कलन गर्दै आएका थिए ।
निर्देशनालयले तालिम दिएसँगै जिल्लाभर ३२ भन्दा धेरै स्वास्थ्य प्राविधिक सो सङ्कलन गर्न सक्ने अवस्थामा रहेको कार्यालयले जनाएको छ ।
तालिममा निर्देशनालयका डा.सञ्जीवमणि रेग्मीलगायतले सहजीकरण गरेका थिए ।
सबै स्वास्थ्य प्राविधिकलाई सङ्कटको सामना गर्न तयारी अवस्थामा रहन उनले निर्देशनसमेत दिए ।
