काठमाडौं । भक्तपुर अस्पतालले १०० शय्याको आइसोलेसन बनाउने भएको छ ।
कोरोना भाइरस (कोभिड–१९) बाट संक्रमित हुनेको संख्या बढेपछि प्रदेशको सामाजिक विकास मन्त्रालयको निर्णयअनुसार भक्तपुर अस्पतालमा कोभिडका बिरामीका लागि एक सय शय्याको अस्पताल बनाउने तयारी गरिएको हो ।
हाल सो अस्पतालमा १५ वटा शय्या र पाँच वटा आइसियु कोरोना संक्रमितका लागि छुट्याइएको छ ।
अब बन्ने सो अस्पतालमा सम्भावित संक्रमितलाई राख्नका लागि १० शय्या, संक्रमितलाई राख्नको लागि १०० शय्या र पाँच आइसियु कोरोना संक्रमितका लागि छुट्याउने तयारी भएको बताइएको छ ।
त्यसैगरी परिपाटीमा पनि पाँच सय शय्याको अस्पताल बनाउन प्रस्ताव गरिएको छ । भक्तपुर अस्पतालबाटै सञ्चालित भक्तपुरको खरिपाटीमा रहेको २०० शय्याको कोरोना अस्पताललाई पाँच सय शय्याको बनाउन प्रस्ताव गरिएको हो ।
यो प्रस्ताव भने प्रमुख जिल्ला अधिकारी, गृह मन्त्रालयलगायत केन्द्र सरकारका निकायले निर्णय गरेपछि मात्रै विस्तार गर्न सकिने भएकोले खरिपाटीको हकमा भने प्रस्ताव मात्रै गरिएको बताइएको छ ।
