भारतीय प्रधानमन्त्री नरेन्द्र मोदीले भारत–चीनबीच विवादित सीमा क्षेत्र (लद्दाख) को भ्रमण गरेका छन् ।
शुक्रबार मोदी भारत, लद्दाखस्थित चीन–भारत सीमाक्षेत्रमा पुगेका हुन् । त्यहाँ पुगेर मोदीले ‘विस्तारवादको युग’ सकिएको बताएका छन् ।
'विस्तारवादको युग सकिइसक्यो, यो विकासको युग हो । इतिहास साक्षी छ, विस्तारवादी शक्ति कि परास्त भएको छ कि पछि हटेको छ ।' मोदीले भने । उनले चीनको नाम भने लिएनन् ।
अचानक सीमाक्षेत्रको भ्रमणमा पुगेका उनले गत महिना दुई तर्फका सेनाको झडपमा मारिएका भारतीय सैनिकप्रति श्रद्धाञ्जली समेत व्यक्त गरे । झडपमा २० भारतीय सैनिकको मृत्यु भएको थियो ।
भ्रमणमा मोदीसँगै भारतीय सेनाका प्रमुख मनोज मुकुन्द नरभाने र डिफेन्स स्टाफका प्रमुख जनरल बिपिन रावत पनि सहभागी थिए ।
पछिल्लो समय चीन–भारतको सीमालाई लिएर तनाव बढिरहेको छ ।
