रुसको दक्षिणी क्षेत्र डागेस्तानको एउटा पेट्रोल पम्पमा विस्फोट हुँदा कम्तीमा १२ जनाको ज्यान गएको छ । घटनामा ६० जनाभन्दा धेरै घाइते भएका छन् ।
रुसी अधिकारीहरूका अनुसार ज्यान गुमाउनेमा बालबालिका समेत रहेका छन् । २५ जनाभन्दा धेरैले ज्यान गुमाएको हुन सक्ने अनुमान गरिएको छ । तर, आधिकारिक पुष्टि हुन नसकेको बीबीसी उल्लेख छ । आगोमा जलेर घाइते भएकाहरूलाई उपचारका लागि राजधानी मस्को लगिएको छ ।

विस्फोटपछि पेट्रोल पम्पमा आगलागी भएको थियो । विस्फोटको कारण अहिलेसम्म खुल्न सकेको छैन । सयौँको सङ्ख्यामा अग्नि नियन्त्रक परिचालन गरी आगो नियन्त्रणमा लिइएको छ ।

त्यहाँ झण्डै २ सय ६० जना आपत्कालीन कर्मचारीलाई परिचालन गरिएको छ । आगो ६ सय वर्गमिटर क्षेत्रमा फैलिएको छ । मखाच्कला मस्कोबाट झण्डै १६ सय किलोमिटर टाढा पर्छ ।