अर्थ एवं सञ्चार तथा सूचना प्रविधिमन्त्री डा. युवराज खतिवडाले पूर्वसञ्चारमन्त्री गोकुल बास्कोटा ७० करोड रुपैयाँ कमिसन डिल प्रकरणमा संवैधानिक एवं संस्थागत विधिबाट निर्क्योल हुन दिन आग्रह गरेका छन् ।
सञ्चार मन्त्रालयमा सरकारका निर्णय सार्वजनिक गर्दै मन्त्री खतिवडाले अडियो प्रकरण छानबिनका सम्बन्धमा सञ्चारकर्मीको प्रश्नमा सम्बन्धित निकायहरूले अध्ययन गरिरहेकाले उनीहरूबाट आउने नतिजा पर्खन आग्रह गरेका हुन् ।
उनले भने, 'यसबारे अख्यिारयार पनि जानकार छ । संसदीय समितिलाई पनि थाहा छ । संवैधानिक ,कानुनी र संस्थागत विधिबाट निर्क्योल हुन दिऊँ । कानुनी अधिकार प्राप्त निकायले अध्ययन गरोस् ।'
त्यस क्रममा अर्थमन्त्री खतिवडाले विकास खर्च गत वर्षको तुलनामा कम नभएको दाबी गरेका थिए । उनले समग्र मुलुकको एकीकृत वित्तीय विवरणले विकास खर्च राम्रो भएको देखाएको बताए । उनले आर्थिक वर्षको अन्त्यसम्ममा बजेटको ९० प्रतिशतभन्दा बढी खर्च हुने दाबी गरे । निर्माण व्यवसायी, ठेक्का पट्टा सम्बन्धी विवादलगायतका कारण आर्थिक वर्षको सुरुवाती दिनमा विकास खर्च हुन नसके पनि पछिल्लो समयमा सन्तोषजनक काम भएको जानकारी उनले गराए ।
अभावजन्य कारणले ठुला भ्रष्टाचार नभएको भन्दै उनले कर्मचारीको तलब बढाएर साना साना भ्रष्टाचार घटाए पनि त्यसले समग्र मनोवृत्ति परिवर्तन नहुने तर्गक गरे ।
पुस्तक बिक्रीमा लगाएको कर सन्दर्भको प्रश्नमा उनले राष्ट्रिय उद्योग र सेवा उद्योगलाई संरक्षण दिन सरकारले कर लगाएको जवाफ दिए । पुस्तक बिक्रीमा धेरै मुलुकले मूल्य अभिवृद्धि कर लगाउने गरेको र त्यो कर १८ प्रतिशतसम्म रहेको उल्लेख गर्दे उनले अर्बौँ रुपैयाँ लगानी गरेर स्वदेशमा स्थापना भएका प्रेसले गर्ने कागज आयातमा पनि कर तिर्नुपर्ने भएकोले पुस्तकमा कर जायज भएको तर्क गरे । उनले पुस्तकको व्यापारलाई ज्ञानको व्यापार भनेर दिग्भ्रमित नगर्न आग्रह गरेका थिए ।
अर्थमन्त्री खतिवडाले नेपाल राष्ट्रबैंकको गभर्नर नियुक्ति चैत ५ भन्दा अगावै हुने जानकारी गराए ।
