काठमाडाैं । नेपालले जारी गरेको नयाँ नक्सासम्बन्धी असन्तुष्टि जनाउँदै भारतले नेपाललाई कूटनीतिक नोट पठाएको खुलेको छ ।
बिहीबार राष्ट्रिय सभाअन्तर्गतको प्रत्यायोजित व्यवस्थापन तथा सरकारी आश्वासन समितिको बैठकमा सभापति रामनारायण विडारीले भारतको कूटनीतिक नोट आएको बताएसँगै सो कुरा खुलेको हो ।
उनले भने, ‘नेपालको दाबीलाई अस्वीकार गर्दै भारत सरकारले असार १० गते कूटनीतिक नोट पठाएको रहेछ ।’
तर, भारतले कूटनीतिक नोट पठाएको विषयमा परराष्ट्र मन्त्रालयले औपचारिक रुपमा बोलेको छैन ।
तर, नेपालले जारी गरेको नयाँ नक्सालाई लिएर भारतको विदेश मन्त्रालयका अधिकारीले सार्वजनिक रुपमा नेपालले जारी गरेको नयाँ नक्सालाई अस्विकार गर्ने बताउँदै आएका छन् ।
सन् १८१६ मा सुगाैलीसन्धिमा कालापानी लिम्पियाधुरासिहत हाल विवादित क्षेत्र नेपालको भनी उल्लेख गरिएको थियाे । तर, सो क्षेत्रलाई अहिले नेपाल र भारत दुवै क्षेत्रले आफ्नाे भनी दाबी गर्दै आएका छन् ।
भारतले सन् २०१९ नाेभेम्बर १९ मा जारी गरेको नक्सामा सो क्षेत्रलाई नसमेटी नक्सा प्रकाशन गरेको थियो, तर पछि पुन: सो नक्सालाई सच्याउँदै नेपालको कालापानीसहितको भूमि आफ्नो भनी दाबी गरेको छ ।
यो बीचमा नेपालले भारतसँग पटकपटक कूटनीतिक नोट पठाउनुका साथै वार्ताको प्रस्ताव गरेको छ । तर, भारतले नेपालको सो प्रस्तावलाई बेवास्था गर्दै आएको छ ।
बरु भारतले उल्टै नेपाली भूभाग अतिक्रमण गरेर बनाएको मानसरोबर जाने सडक उद्घाटन गरेको छ ।
