काठमाडौं । नेकपाका वरिष्ठ नेता माधवकुमार नेपालले नेकपामा देखिएको आन्तरिक किचलोलाई संकेत गर्दै आफू र आन्दोलनलाई समाप्त पार्नतर्फ नलाग्न सुझाव दिएका छन् ।
पुष्पलाल श्रेष्ठ र नरबहादुर कर्माचार्यको स्मृति दिवसको अवसरमा उनले विधिको पालना नगरेर मै स्टेट हुँ भनेर आफूलाई सर्वोपरी ठान्न थालियो भने पतन हुने बताउँदै यस्तो सुझाव दिएका हुन् ।
साथै, उनले कोही मै स्टेट हुँ भन्ने प्रवृतिमा चुर्लुम्म डुबेको भए जोगिन पनि सुझाव दिएका छन् ।
उनले भने, ‘यदि हामी कोही त्यस्तो विचार र प्रवृत्तिमा चुर्लुम्म डुबेका छौँ भने त्यसबाट उम्कियौं, जोगियौं । समय त छ तर धेरै ढिला हुन् थालिसकेको छ ।’
तर, उनले अहिले नै पार्टी फुट्छ कि भन्ने भान नेता कार्यकर्तामा रहेको बताउँदै कसैले फुटाउन खोज्यो भने चोइटिएर जाला तर कम्युनिष्ट पार्टी नफुट्ने बताए ।
उनले नेपाल कम्युनिस्ट पार्टी सर्वहारा वर्गको अग्रदल भएकाले नेपाली समाजलाई रुपान्तरण गरेर समाजवादको दिशामा अगाडि लैजानुपर्ने जिम्मेवारी कम्युनिस्ट पार्टीको काँधमा रहेको बताए ।
‘नेकपा मुलुकको राजनीतिको अग्रपङ्क्तिमा उभिएको छ । जनताले नेकपाबाट ठूलो अपेक्षा गरेका छन् । त्यही विश्वासले गर्दा झण्डै दुई तिहाइको मत दिए । अबको प्रश्न भनेको जनताको आशा र अपेक्षा पूरा गर्न सक्छौं कि सक्दैनौं ? भन्ने हो,‘ उनले भने, ‘यो अपेक्षा पूरा गर्न लागिपरेका छौँ कि छैनौँ ?’
