नेकपा (एमाले)का वरिष्ठ नेता माधवकुमार नेपाल एमाले उपाध्यक्ष भीम रावललाई भेट्न उनको निवास टोखा पुगेका छन् । बुधबार बसेको नेपाल समूहको बैठकमा नेतम रावल अनुपस्थित भएपछि रावललाई भेट्न नेपाल उनको निवासमै पुगेका हुन् ।
साउन ३ गते प्रतिनिधिसभामा प्रधानमन्त्री शेरबहादुर देउवाले विश्वासको मत लिने दिन सांसद पदबाट राजीनामा घोषणा गरेका रावल त्यसयता नेपाल समूहको कुनै पनि बैठकमा सहभागी भएका छैनन् । उनी ओली समूहले आयोजना गरेको बैठकमा पनि सहभागी भएका छैनन ।
पार्टी विवाद समाधान गर्न गठित कार्यदलले १० बुँदे सहमति गरिसकेको अवस्थामा त्यसलाई माधवकुमार नेपालले अस्वीकार गर्ने बताएपछि आफूले राजीनामा दिएको रावलले बताएका छन् । नेता नेपालले आफूलाई विश्वास नगरेको उनको भनाइ छ ।
एमाले विवाद मिलाउन गठित १० सदस्यीय कार्यदलमा रावल नेपाल समूहबाट संयोजक थिए । उनले आफूलाई राजनीतिक रूपमा बेवकुफ बनाउने काम भएको समेत बताएका छन् । आफू निकटका सुदूरपश्चिम प्रदेशका मन्त्री र सांसदहरूसँगको सामूहिक भेटघाट गरी उनले त्यस्तो बताएका थिए । सुदूरपश्चिम क्षेत्रका नेताहरूले भने प्रतिनिधिसभा सदस्यबाट दिएको राजीनामा फिर्ता लिन आग्रह गरेका थिए ।
मंगलबार काठमाडौं आइपुगेका सुदूरपश्चिम प्रदेश सरकारका ४ जना मन्त्रीसहित सांसदहरूले उपाध्यक्ष रावललाई उनको निवास टोखामा भेटेर यस्तो आग्रह गरेका थिए । यद्यपि उनले दिएको राजिनामाका विषयमा भने अहिलेसम्म कुनै निर्णय भएको छैन । पार्टी विवाद समाधान गर्न गठित कार्यदलले १० बुँदे सहमति गरिसकेको अवस्थामा नेता नेपालले त्यसलाई अस्वीकार गर्ने बताइएपछि रावलले राजीनामा दिएका थिए ।
पार्टी विवाद समाधान गर्न भएको १० बुँदे सहमतिलाई अक्षरशः पालना गरेर जानुपर्ने भएपनि त्यसको विपरीत गरिएको रावलले बताउदै आएका छन् । सरकारलाई समर्थन गरे माधव नेपाल पक्ष भइने र नगरे केपी शर्मा ओली पक्ष भइने अवस्था सिर्जना भएकाले आफूले एमाले एकताका लागि राजीनामा दिन बाध्य भएको रावलको भनाइ थियो ।
