दार्चुला । हेलिकप्टरबाट कालापानी क्षेत्रको अवलोकन गरेर उपप्रधानमन्त्री एवं रक्षामन्त्री ईश्वर पोखरेल फर्किएका छन् ।
सोमबार बिहान दार्चुलाको सदरमुकाम खलंगाबाट साढे ८ बजे नेपाली सेनाको हेलिकोप्टरबाट कालापानी क्षेत्रको अवलोकनको लागि उडेको मन्त्रीसहितको टोली ९ बजेपछि फर्किएको हो ।
मन्त्री पोखरेलसहितको टोलीमा दार्चुलाबाट निर्वाचित प्रतिनिधिसभा सदस्य गणेष सिह ठगुन्ना, सुदुरपश्चिम प्रदेशका उप–सभामुख निर्मला बडाल जोशी, प्रदेश सभा सदस्यहरु गेल्वु सिह बोहरा र मान वहादुर धामी सहित उप–प्रधान मन्त्रीका ६ जना सुरक्षाकर्मी थिए ।
उक्त टोलीले कालापानी क्षेत्रको अवलोकन गरको दार्चुलाका प्रमुख जिल्ला अधिकारी यद्धुनाथ पौडेलले जानकारी दिए ।
कालापानी क्षेत्रमा अत्याधिक हिमपातका कारण हेलिकप्टर ल्यान्डीङ हुन नसके पनि हेलीकप्टर बाटै ब्यास गाउँपालिकाको वडा न १ छाङरु, तिंकर लगायत कालापानी क्षेत्रको अवलोकन गरेको प्रमुख जिल्ला अधिकारी यद्धु नाथ पौड्यालले जानकारी दिए ।
दार्चुलाको व्यास गाउँपालिका वडा नम्बर १ क्षेत्रमा कालापानी, लिपुलेक र लिम्पियाधुरा क्षेत्र पर्दछ ।
व्यास गाउँपालिकाको छांगरु र तिंकरमा हिमपातका कारण ६ महिना मात्रै मानिस बस्ने गरेका छन् ।
त्यो बाहेक छ महिना यहाँका स्थानीय बसाई सराई गरेर सदरमुकाम खलंगा झर्ने गर्छन् ।
सुरक्षाकर्मी पनि हिमपातका कारण ब्यास गाउँपालिकाको वडा नं २ दुम्लीङ झरेका छन् ।
सुरक्षाकर्मी र मानिसहरु तल झरेका कारण त्रिदेशीय सीमाक्षेत्र अहिले मानवविहिन बनेको छ ।
तर, भारत सरकारले भने हिउँमा बस्ने विशेष प्रकारको ब्यवस्थापन गरी सीमा क्षेत्रमा आफ्ना सुरक्षाकर्मी राखेको छ ।
